Online Reporter
Sikhumbuzo Moyo
INHLANGANISO yeBulawayo-Nyamandlovu-Tsholotsho Taxis Association isifake i-R10 000 kumsebenzi wokulungiswa komgwaqo osuka koBulawayo usiya eTsholotsho, njalo ibika ukuba umgwaqo lo uyinsika yokuphila kwabantu abanengi.
Imali le inikezwe iTsholotsho Road Rehabilitation Initiative (TRRI) koBulawayo ngoLwesibili ekuseni ngumgcinisihlalo wenhlanganiso uMnumzana Goodman Nkomo lonobhala uMnu Majaha Fuzwayo.
Imali yamukelwe ngumgcinisikhwama weTRRI uNkosikazi Lifneth Moyo lomphathi wokulandelisisa inhlelo lemithetho uMnumzana Nkanyezi Ndlovu.
UNkomo uthe babone kufanele ukuthi labo babe yingxenye yomkhankaso wokulungisa umgwaqo lo ngoba yibo abawusebenzisa nsukuzonke.
“Umgwaqo uyinsika yokuphila kwethu njalo thina sizizwe kufanele ukuthi sihlangane lomphakathi sinikele okuthile. Abanye labo banikele bebodwa,” kutsho uNkomo.
UFuzwayo uthe kuyajabulisa ukubona uHulumende esewusekela umsebenzi lo, owethulwe ngokusemthethweni nguMphathi weState for Provincial Affairs and Devolution eMatabeleland North uRichard Moyo ekuqaleni kwenyanga kaNtulikazi.
Umsebenzi wokulungisa umgwaqo lo usuqalile, usenziwa ngokubambisana leTsholotsho Rural District Council kanye leMguza Rural District Council. Umsebenzi lo ukhangelelwe ukuqedwa phakathi kwezinsuku ezingu-60, kungakafiki isikhathi sezulu, ukuze umgwaqo ube sesimeni esingcono.
UNkkz Moyo uthe ukulungiswa komgwaqo akusoze kusize abatshayeli kuphela kodwa kuzakwenza lemisebenzi yamabhizimusi lezinye ingxenye zomnotho zikhule.
“Ibhizimusi lizaba lula ngoba izimota zenu kazisayikuphazamiseka kakhulu ngenxa yesimo somgwaqo. Lokhu kuzakwehlisa indleko zokuhamba, njalo abantu abahambayo bazasala lemali abangayisebenzisa kwezinye izidingo.”
I-TRRI yasungulwa njengomkhankaso oqhutshwa ngumphakathi wokulungisa ingxenye zomgwaqo weTsholotsho, obusubangela ukukhathazeka okukhulu kubatshayeli labantu abahambayo ngenxa yesimo sawo esibi.
