Online Reporter
Fungai Muderere
IDOLOBHO lakoBulawayo lamukele ngentokozo enkulu indodakazi yalo, uNobukhosi Nobuhle Tshuma, ngemva kokwenza imbali kuComrades Marathon ka-2026 eSouth Africa.
IJoshua Nkomo Legacy Restoration Project Trust (JNLRPT) ngoLwesithathu ihlele umkhosi omkhulu wokwamukela kanye lohambo lokunanza impumelelo yakhe kulandela ukubonakala kwakhe kulumncintiswano odume umhlaba wonke.
UTshuma ulethe injabulo kuzizalwane zeZimbabwe ngemva kokuqeda esendaweni yesibili kuComrades Marathon, okumenze waba ngowesifazane wokuqala wakuleli ukungena phakathi kwabathole izicoco kulumncintiswano omude kangaka.
Impumelelo yakhe iphinde yaba ngeqakathekileyo ngoba usengowesifazane wokuqala omnyama ukufinyelela esiqongweni se- “Up Run Podium” kumbali yomncintiswano lo owasungulwa ngomnyaka ka-1921.
Abanengi sebechaze impumelelo yakhe njengenye yezinkulu kwezemidlalo eZimbabwe eminyakeni edluleyo. Abaphathi bezemidlalo, abakhokheli benhlanganiso ezitshiyeneyo lomphakathi jikelele bancome ukuzimisela, ukusebenza gadalala lokubekezela kukaTshuma.
NgoLwesithathu ekuseni, uTshuma ufike egcekeni lendizamtshina eJoshua Mqabuko Nkomo International Airport lapho amukelwe khona ngokusemthethweni ngaphambi kokuba aqalise uhambo lokuhlonitshwa emigwaqweni yakoBulawayo.
Uhambo ludlule eMakokoba, enzikini yedolobho, eJoshua Nkomo Museum eMatshumhlope laseBulawayo City Hall Imikhosi yokumncoma iphethe ngokuqhutshwa kombuthano wokukhuthaza abasakhulayo eTownsend High School.
Impumelelo yakhe ayiphakamisanga kuphela ilizwe kwezokugijima, kodwa iphinde yanika ithemba kubagijimi abasakhulayo, ikakhulu amantombazana, ukuthi labo bangaphumelela emiqhudelwaneni emikhulu yomhlaba nxa bengasebenza nzima njalo bezimisele.
Ngesikhathi uBulawayo lelizwe lonke behalalisela elinye lamaqhawekazi alo kwezemidlalo, ukubuya kukaTshuma kutshengisa isibindi, ubungcitshi lomoya wokulwela impumelelo. Impumelelo kaTshuma ayisiyo yakhe yedwa, kodwa iyimpumelelo yezemidlalo elizweni lonke.
