admin
INtatheli kaMthunywa
AMALUNGA emuli amathathu atholakale efile kungozi okucatshangelwa ukuthi ibangelwe yimbawula abalele beyothile esigabeni seZezani eBeitbridge ngempelaviki.
Kubikwa uMnumzana Lemohang Tlou, uNkosikazi wakhe kunye lomntwana osanda kuzalwa bahle bavuka bebhubhile ngemva kokuhotsha intuthu esuka kumbawula bazatholakala ekuseni ngomunye umntwana.
Umntwana lo kubikwa uphuthume wayabikela izakhamizi zona ezihle zaya emapholiseni ukuyawabikela ngesehlakalo lesi.
Izidumbu zalaba abathathu zithwalelwe esibhedlela seBeitbridge District Hospital lapho eziyehlolwa khona.
Ekhuluma lentatheli kaMthunywa uMnumzana Vusa Moyo oyisakhamuzi ubike ukuba kube buhlungu kuzakhamizi ukulahlekelwa ngamalunga emuli amathathu ngasikhathi sinye kubangelwa yimbawula.
“Asazi ukuthi senzeni ngalokhu okusehleleyo nanko phela kubhubhe umdeni wonke okungubaba, unkosikazi kanye lomntwana omncinyane.
“Kasilankani sibili besesikhalela ukuba ngabe kwasala oyedwa obezalandisela abantu ukuba kwahamba njani kodwa ngokuswelakala kwenhlanhla akusindanga ngitsho loyedwa, babhubhe bonke.
UMnu Moyo uthe njengesigaba bacela ukuncediswa kungaba yiloba yini.
“Sicela usizo ngoba umsebenzi esikhangelane lawo umkhulu njalo sisesikhathini esibuhlungu eseCovid-19. Ingozi enje ingehlela iloba ngubani empilweni. Kudingakala okutshiyeneyo okuphathelane lomngcwabo walaba abathathu,” kutsho UMnu Moyo.
Isikhulumi samapholisa esabelweni seMatabeleland South uInspector Philisani Ndebele uthe umbiko ngalingozi ufikile emawofisini abo.
“Imuli le engasekho emhlabeni ibisotha imbawula kungakho kungenzakala ukuthi imbawula yiyo ebangele ukufa kwayo.
“Ngeke ngitsho ukuthi babulewe yimbawula ngoba kusalindwe impumela yokuhlolwa kwezidumbu.”
Online Reporter