Online Reporter
Nkosilathi Sibanda
KULAMADODA amabili akoBulawayo agwetshelwe ukuyahlala ejele iminyaka emithathu kulandela ukuzama ukubulala enye indoda abasebenza layo.
Lokhu kuvele ngesikhathi uNjabulo Mpofu (31) owelokitshini leMabuthweni lo Clinton Mlilo (27) oweNkulumane 5 bemiswe phambi komthethwandaba kamantshi koBulawayo. Batholakale belecala lokuzama ukubulala.
Ngokubika kweNational Prosecuting Authority of Zimbabwe, isehlakalo lesi senzakala mhlaka-10 Ntulikazi 2026, ngehola lika-9 ebusuku, lapho abasolwa laba, ababesebenza eSprings Central Mine eMguza, abaxabana khona lomunye abasebenza laye uRoy Gwauya (29).
Ekuxabaneni lokhu, abasolwa laba, labanye ababili abalokhe bengekabotshwa, bahlasela uGwauya ngobudlwangudlwangu. Kubikwa abasolwa laba bagwaza uGwauya kanye ehlombe lesandleni sokunxele ngengqamu, njalo bamtshaya kanye esiphaqeni ngebhola le-snooker.
“Ngemva kwalokho uGwauya wahlolwa ngabezempilakahle kwenziwa lombiko wamapholisa, okwenza kwabotshwa abasolwa. Ababili laba bagwetshelwe ukuyahlala ejele iminyaka emihlanu kwathi iminyaka emibili yesulwa kukhangelelwe ukuthi bangadali icala elifananayo kuminyaka emihlanu ezayo.
Lokhu kutsho ukuthi ngamunye wabo uzasebenza isigwebo esipheleleyo eseminyaka emithathu ejele.
I-National Prosecuting Authority of Zimbabwe ikhathazekile ngezenzo zodlame lokuziphatha okungafanelanga phakathi kwezisebenzi lamalunga omphakathi.
