admin
Johas Moyo
ABALIMI abakumaqembu azimele wodwa eNyamandlovu bakhuthazwa ngabenhlanganiso ebona ngezempilakahle yezifuyo ukuthi badingele izifuyo zabo ukudla kwebusika ngoba kungelatshani obufana lakweminye iminyaka edluleyo.
UMnumzana Irvin Masuku onguLivestock Production Extension Officer kuWadi 5 ukhuthaze abalimi bonke besigabeni seNyamandlovu ukuthi balungiselele izifuyo zabo ukudla kwebusika ikakhulu inkomo ngoba lonyaka isimo sikhanya sisibi njalo lokusilela kwamadlelo kwenza inkomo zibesengozini yendlala.
“Abalimi kabananzelele ukuthi akusela cingo endaweni ezinengi njengalokhu okwakukhona ngokunjalo kabadobhele izifuyo zabo ukudla ngoba imikhandlo iyabe sidliwe zinkomo ezingeluswanga ngabantu.
“Sikhuthaza abalimi ukuthi badingele inkomo zabo amawohlo kanye labantwana bogagu bazigcinele ngoba kuzaba lusizo ebusika njengoba indlala ikhanya inkulu lonyaka,” kutsho uMnu Masuku.
Uthe inkomo zidinga ukuthi zincediswe ngokudingelwa ukudla kwesilungu (survival feed) okufana lesidabhula letswayi okuzahlanganiswa lamahlanga ukuthi kwenze izifuyo ziqine.
“Utshani obomileyo kabenelisi kunika izifuyo wonke amaphulotheni (proteins) adingekayo ngokunjalo kudingeka ukuthi buncediswe ngetswayi lesidabhula kuhlanganiswe lotshani buncedisane lamahlanga kanye lokunye ukudla okufana le-licking stone okwenza inkomo zibuye zodwa ntambama emakhaya.
“Inkomo zingakuphiwa lokhu nsukuzonke ntambama kazicubi njalo kwenza zibe lamandla,” kutsho Mnu Masuku.
Uphethe ngokukhumbuza abalimi ukuthi laloba benelisile ukuthi badingele izifuyo zabo ukudla kabangalibali ukuthi izifuyo zabo kumele zihlale zidozwa ngaso sonke isikhathi ukuze kubulawe izibungu ezingaqeda ukudla kwezifuyo emathunjini azo.
Online Reporter