admin
Cornelius Luphahla
UNQINDI imbongi edume ngokujabulisa uzulu useveze ukuthi useqalisile ukupheka idlalade lenkondlo lezithakazelo ngenhloso yokuthuthukisa ezamasiko kuleli.
UNqindi ogama lakhe lokuzalwa linguLerato Ndlovu udabuka eNtalale eGwanda upheka idlalade eliqukethe izibongo zamakhosi amakhulu akoMthwakazi.
Imbongi le ipheka idlalade nje ngemva kokunanzelela ukuthi inengi labantu koMthwakazi kalenelisi ukuyizwa ihaya njalo lalabo abayizwayo kubanzima ukuthi bakubambe lokhu ekukhulumayo yikho nje ibone kungcono ukuthi ipheke idlalade ukuze umuntu wonke azizwele kudlalade leli ngesikhathi asithandayo.
UMthunywa uxhumane loNqindi wachaza ukuthi okwenze wapheka idlalade yikuthi ufuna ukuthi kulondolozwe amasiko akoMthwakazi njalo usazopheka amanye amadlalade agoqela uzulu wonke.
“Nginanzelele ukuthi amasiko akoMthwakazi atshabalala ngamandla ngenxa yokuswela abawananzayo yikho nje ngibone kungcono ukuba ngipheke idlalade elilezibongo zamakhosi. Izibongo lezi ziqukethe imbali yamakhosi kanye lembali yesizwe sakoMthwakazi.
“Kulelidlalade kulezibongo ezigoqela uKhumalo, Luphahla, Mkhwananzi, Matshazi, Mafu, Mathe kanye lezinye izibongo zamakhosi amaNdebele. Okunye njalo kulezangelo zikaJoshua Mqabuko Njongolo Nkomo njengomunye wamaqhawe amakhulu akuleli asitshiyayo.
“Khathesi ngikhethe ukubonga amakhosi amakhulu kuphela ukuze uzulu azi ukuthi amakhosi alapha koMthwakazi ngobani. Ensukwini ezizayo ngizapheka amanye njalo amadlalade abonga uMthwakazi wonke jikelele ukuze azi izangelo zakhe avuselele ubuzwe bakhe,” kutsho uNqindi.
UNqindi uqhubekele phambili waveza ukuthi idlalade lakhe leli lilezangelo lenkondlo ezinengi kakhulu njalo usazoyaliphekisisa phetsheya kwelizwe.
“Idlalade lami lilenkondlo kanye lezangelo ezilitshumi, zonke zijonge ukuvuselela ubuntu bakoMthwakazi. Eyinye yenkondlo lezi ikhuluma ngezothando kanye lobuhle balo. Ngokunjalo idlalade leli ngisazoyaliphekisisa kweleSouth Africa njalo ngikhangelele ukuthi ekuqaleni kwenyanga ezayo ngibe sengilikhiphele uzulu ukuze azinambithele uluju lwezamasiko,” kuphetha uNqindi.
Online Reporter