Online Reporter
Nkosilathi Sibanda
AKULA muntu obengamazi uBabongile Sikhonjwa. Ongazange ahlangane laye empilweni, engabe elazi ibizo lakhe kumbe wake wezwa ngaye lendumela zakhe.
USikhonjwa wedlule emhlabeni ngeSonto ekuseni esibhedlela se-United Bulawayo Hospitals koBulawayo, ngemva kokukhala ngokuvaleka umphefumulo.
Ubeleminyaka engu-49 yokuzalwa.
Kunengi okungakhulunywa ngempilo kasaziwayo lo owaduma kwezokuthokozisa uzulu kuleli, engena kwezomculo, ukulingisa, ukusakaza lokuhlanganisa uzulu ebunandini.
Umngane wakhe oseduzane, okade elaye ngesikhathi sokufa, uHaslam Maenzanise uthe babebonke ngempelaviki.
“Ubekwami ngempelaviki, sachitha isikhathi sidlala amakhasi ebusuku. Ngamtshiya ngehola lesithathu ngisiyalala, ngathi ngisiyamkhangela, kazange aphaphame. Ngaphanga ngamgijimisela esibhedlela lapho okwathiwa usefile,” kutsho uMaenzanise.
Emsakazweni uSikhonjwa usebenzele iStar FM leSkyz Metro FM.
Imuli yakoSikhonjwa yethule umbiko ngokulahlekelwa.
“Sibika ngokudabuka okukhulu ngokwedlula emhlabeni kwendodana yethu uBabongile Sikhonjwa. Uthinte impilo zabantu abanengi abakade bemazi.
“Ngalesisikhathi, imuli icela ukuthula lokuhlonitshwa ukuze silungiselele umngcwabo wakhe. Siyamukela imikhuleko lokusikhumbula kwenu.”
Inengi labantu koBulawayo selethule induduzo emulini yakoSikhonjwa. Kunkundla zokuxhumana ebulenjini, umuyi uchazwe ngokuthi ubezithandela ukukholisa lokuthokozisa abantu.
Omunye walabo abakade beseduzane loSikhonjwa, ongusomabhizimusi ozimeleyo, uKhumbulani Dube uthe: “Ngimadolo nzima.
Ngiyehluleka ukuthi ngikhulume. USikhonjwa ubengumfana wami. Besingaqedi iviki singakhulumisananga. Nxa ngidinga okuthile bengiqonda kuye, laye abuze kimi. Kalale ngokuthula.”
Omahlekisa uNtando Van Moyo uthe balahlekelwe.
“Kambe sizasala siyini ngokusuka kukaSikhonjwa. Hamba kuhle qhawe lethu.”
Kusenjalo, amankampani lengatsha lapho okwasebenza khona uSikhonjwa asethule amazwi enduduzo.
