admin
Wayne Ncube
INKAMPANI yeFarm and City Centre isikhuthaze abalimi ukuba balime amabele ikakhulu endaweni ezilezulu elincane ngoba kawadingi izulu elinengi, njalo ayaphangisa ukuvuthwa.
Ekhuluma lentatheli kaMthunywa uNkosazana Samkelisiwe Sibanda oyingcitshi kweze-Agronomy kule inkampani uthe abalimi ikakhulu abahlala endaweni ezilezulu elincane kufanele balime amabele ukuze bathole isivuno esiphezulu loba izulu lililutshwane lokhu kuyancedisa ukuthola inzuzo enhle.
“Imihlobo yonke yamabele iyenelisa ukuvuthwa iloba izulu lililutshwane. Imihlobo le igoqela amabele amhlophe kunye labomvu, ngaphansi kwale imihlobo kulamabele amafitshane lamade.
“Amabele amafitshane amhlophe athiwa yitshetha, yiwo amabele anika isivuno esikhulu, itshetha linika isivuno esikhulu ngoba iba lamaxhakela ikakhulu nxa izulu lilinengi. Lokhu kwenza izikhwebu zakhona zande, okuyikho ukwenza isivuno sibe sikhulu,” kuchaza uNkszn Sibanda.
Amabele wonke athatha amalanga angaba ngu-90 ukuze avuthwe njalo ayadliwa wonke. Okungahlasela amabele yimitshiphela lenyoni, kodwa inyoni yizo ezandise ukuhlasela kakhulu ngakho abalimi bakhuthazwa ukuthi kabahlale beqaphele ukuthi baxotshe inyoni njalo nje.
UNkszn Sibanda ugcizelele ngokuthi inyoni zidla kakhulu amabele amhlophe athiwa litshetha, kodwa isibhuku kunye leminye imihlobo yamabele abomvu kayihlaselwa zinyoni kodwa yimitshiphela.
“Imitshiphela kayandisanga kangako ukuba yingozi emabeleni kodwa kanengi yiyo eyejwayelekileyo ekoneni isivuno samabele.”
Kubikwa amabele alomkambo omuhle ikakhulu kubalimi abalima ngokuthelela ngoba sebengalimela ukuthengisela amankampani apheka utshwala.
Online Reporter