Online Reporter
Nkosilathi Sibanda
“Angilayo imbali” Le yiyo ingoma ezabe ihlatshelwa ngesikhathi iqembu lomculo elilodumo kulezinsuku elivela eSouth Africa, iCardinal X25, lithokozisa abalandeli balo ngoLwesihlanu, kwenye ihotela koBulawayo.
ICardinal X25 itshintshana inkundla labanye abaculi abathandwa ngabanengi kuleli, uJah Signal loZhezhingtons.
Ngempelaviki edluleyo iCardinal X25 ibe lomcimbi wayo wakuqala kuleli, beqhunsa eGwanda, esabelweni seMatabeleland South.
Umqoqi wemicimbi le, uDJ Keitho uthe ngemva komcimbi weGwanda, abalandeli bathi bafuna ukubabona futhi, okwenze sababisa koBulawayo laseBeitbridge.
ICardinal X25 yaziwa kakhulu ngengoma ethi “Anginayo Imali”, njalo abalandeli bazathola ithuba lokuzizwela umdumo mathupha.
UDJ Keitho utshele iphephandaba likazulu ukuthi abanye abazancedisa ukuthokoziseni nguMC Freddy K, uMC Kay One loMr Jaiva. ODJ Ayaxx, Keitho, Flexxy, SKB loRiggs
“Sihlose ukuhlela umcimbi ohlanganisa imihlobo etshiyeneyo yokuzilibazisa endaweni eyodwa. ICardinal X25 ithole udumo olukhulu lonyaka, ikanti loJah Signal loZhezhingtons labo balabalandeli abanengi. Ukuba hlanganisa kutsho ukuthi abathandi bomculo bazathola ithuba lokubona umdlalo ohlukeneyo,” kutsho uDJ Keitho ngoLwesine.
“Asifuni ukuletha abaculi bakwamanye amazwe kuphela. Sifuna labaculi bethu labo DJ, bathole amathuba okubonakala. Inhloso yikuthi wonke umuntu athole ithuba lokuveza ithalenta lakhe, abalandeli labo bathole ukuzilibazisa.”
