admin
Ethel Ncube
KULENINA lelokitshini leMinyela koBulawayo elidlwengulwe ngumtshayeli wemota lincediswa ngamanye amanina amabili, uMthunywa ukuzwile lokhu.
Insindabaphenduli le yenzakale ngoLwesihlanu kuviki ephelileyo lapho elinye inina elileminyaka engu-26 lidlwengulwe ngumtshayeli wemota yomhlobo we-Honda fit eliyigade lisuka elokitshini leMinyela lisiya eMganwini.
Kubikwa inina leli lagada iHonda fit eyayilabomama ababili lomtshayeli kodwa bathe bephakathi komango imota yangena umgwaqo ongena iganga andubana bathi sebesegangeni bamehlise bamlaye ukuthi ahlubule isigqoko saphezulu basithatha bamvala ngaso amehlo, omunye ekhuthuza isikhwama sakhe.
Kubikwa ngaleso sikhathi omunye wamanina lawa wayephethe elokhu emtshaya umtshayeli yena emdlwengula.
Kuzwakale ukuba ometheswacala sebenze lokhu bangena emoteni baphosela impahla zakhe phandle andubana babaleke ngemota.
Omele isikhulumi samapholisa koBulawayo uAssistant Inspector Nomalanga Msebele uveze ukuba bachwayisisa udaba lwenina elagada imota laselidlwengulwa endleleni.
“Sichwayisisa udaba lapho elinye inina elagada imota yomhlobo we-honda fit engelama-number plates lahlukuluzwa endleleni.
“Sikhuthaza uzulu ukuthi nxa egada imota agade imota ezilenombolo. Sicela ongabe elolwazi ngabacatshangelwa ukuthi badala leli icala athinte amapholisa aseduzane laye,” kuphetha uAsst Insp Msebele.
Online Reporter