admin
Thokozile Mbedzi
AMAPHOLISA eZimbabwe Republic Police esabelweni seMatabeleland South asesungule umkhankaso wokulwisa ukuphathwa kwezikhali eziyingozi ngenhloso yokunciphisa udlakela kanye lamacala enziwa kusetshenziswa izikhali lezi eziyingozi.
Inkokheli zamapholisa esabelweni lesi ezintathu, uChief Superintendent Tichaona Nyongo ophethe eBeitbridge, uChief Superintendent Mandlenkosi Moyo ophethe iGwanda loChief Superintendent Mafema ophethe iBulilima-Mangwe zithe ukuvinjwa kokuthwala izikhali eziyingozi kuza ngemva kokunanzelela ukuthi asemanengi amacala adalwa kusetshenziswa izikhali ezehlukeneyo.
Amapholisa avimbe ukuphatha izikhali eziyingozi ezigoqela amabhemba, amarekeni, amahloka, imikhonto, ingqamu, induku, izidakamizwa kanye lezinye ezazisetshenziswa kudala ngesizatho sokuba asemanengi amacala okutshontsha abantu behlomile, okubulalana, awokuzama ukubulala ngoba sebenanzelele ukuthi emacaleni lawa izikhali lezi yizo ezisetshenziswayo.
Omele isikhulumi samapholisa esabelweni seMatabeleland South uAssistant Inspector Thabani Mkhwananzi uthe umkhankaso lo, wokulwisa ukuphathwa kwezikhali wenziwa ngaphansi komthetho kaSection 4 weMaintenance of Peace and Order Act, kuChapter 11:23 njalo ukhangelelwe ukuphela mhlaka 23 Mpandula 2021.
“Kusukela khathesi kusiya kumhlaka 23 Mpandula akulamuntu ovunyelwa ukuthwala izikhali ezibalisa amabhemba, amarekeni, amahloka, imikhonto, induku, ingqamu lezinye izikhali emphakathini.
“Labo abazatholakala bethwele lezi izikhali bazabotshwa ngoba bephambanisa ukuvikeleka komphakathi,” kuchasisa uAsst Insp Mkhwananzi.
“Umkhankaso lo uzaphela mhlaka 31 Ntulikazi eGwanda njalo lowo ozakwephula umthetho lo uzahlawuliswa imali engadluli ekaLevl 5 kumbe ukuya ejele okwenyanga eziyisithupha.
“Esigabeni seBulilima-Mangwe umkhankaso lo 11 Ncwabakazi, kukanti eBeitbridge uzaphela ngoMpandula,” kuphetha uAsst Insp Mkhwananzi.
Online Reporter