Online Reporter
Nkosilathi Sibanda
BEKUNGASIMUNTU kuyibunyonyo enkundleni yeWhite City koBulawayo ngoMgqibelo emkhosini waMatshitshi Cultural Festival, lapho amankazana akhuthazwe ukuthi agcine ubuntombi bawo, ahloniphe imizimba yawo njalo alondoloze amasiko esiNtu.
Umkhosi lo, oqoqwe yinhlanganiso yeSigiya Ngamasiko Ethu, ubuhlanganise induna zomdabu labanye, abammeli bakaHulumende, abazali, leziphathamandla zenhlanganiso zamasiko.
UMhlonitshwa omkhulu kulumkhosi bekunguMphathintambo obona ngokwenzakala koBulawayo uJudith Ncube, ogcizelele ukuthi uHulumende uzimisele ukusekela intuthuko lenhlalakahle yabantwana ngoba yibo ikusasa yelizwe.
UNcube ukhuthaze amatshitshi ukuthi alondoloze ubuntombi babo.
“Bantwabami zigcineni. Ligcine ubuntombi benu,” kutsho uKhomuredi Ncube, esengeza ngokuthi imikhankaso enje iqakathekile ngoba ihlanganisa amasiko, imfundo, impilo kanye lokuphepha kwabantwana elizweni. Uthe ingatsha zeMidlalo, Ezokuzilibazisa lamasiko kanye lolubona ngezeMpilakahle kanye lokondliwa kuhle kwabantwana sezithathele phezulu imbuthano lenhlelo eziphakamisa impilakahle yabasakhulayo njalo zizaqhubeka zisekela inhlelo lezi.
UNcube uphinde wamukela izethekeli ezivela ngaphandle kwelizwe, ezigoqela owayengu-First Lady weSouth Africa uNompumelelo Ntuli-Zuma.
Abanye ngabakade bevela eSouth Africa, laseLesotho.
UMphathintambo uNcube uthe ukuba khona kwezethekeli lezi kutshengisa ukuqakatheka kokulondolozwa kwamasiko, isithunzi lelifa labantu base-Africa.
Kumkhosi lo, inengi lezikhulumi likhuthaze amatshitshi ukuthi azigqaje, ahloniphe imizimba yawo njalo benze izinqumo ezilondoloza isithunzi sabo.
Induna labanye abakhokheli bomphakathi babelane ngolwazi mayelana ngokuqakatheka kwamasiko ekwakheni abantwana abalesimilo esihle.
Andubana kubuthanwe eWhite City, amatshitshi angaphezu kwe-200 angene enkambeni yezifundo, lapho afundiswe khona ngembali lamasiko lokuziphatha.
Ogogo abafundisa amatshitshi babikele iphephandaba likazulu ukuthi abantwana sebelindele njalo lokuya kumkhosi weNkosi uMzilikazi mhlaka 4 kusiya ku-5 Mpandula.
Ukuba khona kwenduna leziphathamandla zikaHulumende kugcizelele indima ekulondolozeni amasiko lokudlulisela ulwazi kusukela kwesinye isizukulwane kusiya kwesinye.
