Online Reporter
Lovemore Dube
ABAQOQA imidlalo yeKuzana Boxing Tournament sebephiwe ilungelo lokuthi imidlalo le ibekhona koBulawayo mhlaka 12 Mfumfu.
Imidlalo le iyingxenye yeKuzana SCEEZ Exhibition ehlanganisa bonke abaphatheka kwezemidlalo njalo injongo yikuthi kutholakale amathuba angenza inhlelo zithuthuke elizweni.
Abakumdlalo wenqindi abaseHarare baxhumane loAnderson Sibanda kwathi abakoBulawayo loArvian Mathe, bavumelana ukuthi basebenze ndawonye ukuze umdlalo lo uphakanyiswe.
AbeZimbabwe National Boxing and Wrestling Control Board bathumele incwadi uMarshall Gore loGilbert Munestsi ukuze bathole imvumo yokuqhubeka ngamalungiselelo omncintiswano ozabe ukoBulawayo.
Ngemva kokuthola imvumo le ngoLwesibili, baqoqe umhlangano babonisana labanye abathanda umdlalo ngokumele kwenziwe.
UMunetsi uchasise ngokuqhubeka kwamalungiselelo njalo waveza ukuthi balutshwana abancedisayo ngaphandle kukaHulumende.
“Sengikhulumisane labanye abasekeli labalolonga abafana silungiselela imidlalo. Konke nje kuhamba kuhle,” kutsho uMunetsi.
Uveze njalo ukuthi uHulumende ubaphe indawo lapho okuzadlalelwa khona, uHall Three, eZimbabwe International Trade Fair.
“UHulumende siyambonga kakhulu ngesenzo sakhe sokuphathisa kuhlelo lwemidlalo ezayo ngokusipha inkundla.
“Lokhu sekusehlisele indleko njalo labo abazabuya labadlali bazaphathisa ngendawo zokuhlala lokudla. Akusimlandu womuntu oyedwa, njengensukwini ngowethu sonke,” nguMunetsi lo.
Akuvamanga ukuthi basebenzisane ngendlela enjengale abaqoqa imidlalo le, kodwa ngalesisikhathi basukume bonke bathi uBulawayo kavuke.
UStalin Mau Mau, Wesley Macdade loClyde Musonda bangabanye labo abaphakathi kohlelo.
