admin
Mthokozisi Dube
KUBANJWE amasela enkomo embathise inkomo abeyitshontshile ngengubo esiqintini seThelela koMapenga ngaphansi kwenduna uNdube eFilabusi.
Iphephandaba likazulu libikelwe ukuba lesisehlakalo senzakale kumaviki amabili edluleyo lapho uEliah Ndebele oleminyaka yokuzalwa engu-43 njalo ehlala koLangwani ngaphansi kwenduna uNdube atshontsha inkomo eloNkosinathi Maseko ohlala esigabeni sePhikelela eFilabusi yena okunakanelwa ukuthi uleminyaka engu-41 yokuzalwa bayifihla enqoleni beyembathisa ngengubo.
Umamangala kulelicala nguLeornard Ndlovu ohlala eZhulube.
Abasolwa kubikwa batshontsha inkomo le bayibopha bayembathisa ngengubo basebeyifaka enqoleni bathi beyithwele babanjwa ngamanye amapholisa eFilabusi bahle bacela ezinyaweni. Amapholisa kubikwa abagijimisa aze abamba uEliah ngemva kokumethusela ngombhobho.
Amapholisa aqhubekela phambili ngokudinga uNkosinathi laye wacina esebanjiwe. Amadoda la akhangelelwe ukumiswa phambi kwenkundla yeFilabusi mhlaka 27 kuyonale inyanga.
UMthunywa ubikelwe ukuba ubukhokheli bumunyu kulandela lesisenzo esilihlazo kangaka emphakathini kungakho ubukhokheli butshayela amapholisa ihlombe kulandela umsebenzi wawo omuhle kangaka.
Isikhulumi samapholisa esabelweni seMatabeleland South uAssistant Inspector Nkosilathi Sibanda uvumile ukuba kulodaba olunjalo oluzangena enkundleni.
“Silodaba olunjalo sibili ngempela njalo luyangena enkundleni kuviki ezayo kodwa kwakulithole hatshi inkomo enkulu,” kubika uAssistant Inspector Nkosilathi Sibanda.Iphephandaba likazulu litshelwe ukuba umamangala nguye owaze wayathinta inkomokazi yakhe ukuze izemunyisa lelithole.
Online Reporter