admin
Nkosilathi Sibanda
KUKHULUNYWE inkalakatha yenhlamba kuqembu leCAPS United kubangwa udaba lokungaholi kwabadlali, okubikwa sebehlaselwe yindlala kumalanga la inguqu ingadlalwa.
Kusegudwini izwe lonke ukuthi ngoMvulo kuqhamuke impi yenkulumo phakathi kukaNhamo Tutisani omunye wenkokheli zeCAPS United labadlali. Abadlali babuze ngeholo labo kodwa uTutisani ubathethise ngamagama angeke alotshwe kuphephandaba likazulu.
“Angilamali yenu. Hambani emthethwandaba liyebatshela, angifuni ukulibona. Alisoke lidlalele iCaps United futhi . . .” kutsho umsekeli kamongameli weqembu lo, ephendula abadlali.
Kubikwa omunye wabadlali ubuze ngesihle ukuthi bakhangelele nini ukuthola imali waphendulwa ngenhlamba eyethusayo.
Abadlali kuthiwa balenyanga ezimbili bengaholi.
Iqembu leli liphakathi kwenkinga ezikhangelane lawo wonke amaqembu enguqu ngalesi isikhathi se-lockdown yeCovid-19. Amaqembu amanengi kuleli aholisa abadlali ngemali ezibhadalwa ngababukeli enkundleni.
Ngokudingisisa kwephephandaba likazulu, kuzwakale ukuba abadlali bacele iholo labo ngoba bezwe ukuba iNetOne inike uTutisani lezinye inkokheli imali ethile ebisenela ukubaholisa bonke.
Online Reporter