adminNcekwenhle Ncube
BAKHUZIMHLOLA njalo bazonde bagane unwabu abazali abalabantwana abafunda eEastview High School eseMahatshula koBulawayo kulandela ukusabalaliswa kwevidiyo yabafundi ababili bezincindela uluju lwemvelo kunkundla zokuxhumana.
Inkemenkeme yendaba le etshiye ababalisi kanye labafundi bakulesi isikolo bebambe owangaphansi yenzakale emavikini amabili edluleyo lapho omunye umfundi osebangeni likaFomu 4 (igama siligodlile) ebuye levidiyo yakhe esemambathweni lentombi yakhe ekuFomu 3 wayitshengisa abangane bakhe esikolo.
Omunye umfakazi oqotho uthe umfana lo wasuka watshiya i-laptop yakhe eyayilevidiyo ebanganeni bakhe bedlala umdlalo wenguqu obizwa ngokuthi yiFifa okwenza abanye ababeyibonile bayitshontsha bayifaka kubomakhalekhukhwini babo baqala ukuyithumezelana kuWhatsApp.
UMthunywa uzwe ukuthi ividiyo le yaphekelwa eCement Side lapho abafundi laba bobabili abafunda besuka khona.
Kuvidiyo le esezandleni zikaMthunywa kodwa imifanekiso yayo engeke yakhitshwa kuphephandaba lemuli elinjengalaleli kubonakala abafundi laba bobabili bethandelene okwenyoka imilomo incamuzana. Ngemva kwalokhu umfana ubonakala esencindiswa nguntombazana lo ngendlela eyisimanga. Oyibonileyo ngeke athi ngabantwana abenza kanjalo. Ukwenza kwabo kutshengisa ukuthi ngabantu abalolwazi olujulileyo ngezocansi. Okuyisimanga yikuthi abesabi lokutshengisa ubuso babo kulividiyo bayazijabulela baqabulane cala celeni.
Abasiki bebunda babike ukuthi ababalisi phose bonke esikolo lesi bayibona ividiyo le abandise ukuyibiza ngokuthi yisex tape njalo balayo kugoqela abafundi bonke abasesikolo lesi labasuka kwezinye izikolo eziseduze.
Intatheli kaMthunywa ikhulumisane labazali abalabantwana abafunda kulesisikolo abakhulume ngenhliziyo ezibuhlungu ngesenzo sabantwana lesi.
UNkosikazi Sithandazile Moyo uthe into eyenziwe ngabantwana laba ilulaza isikolo njalo ababalisi kumele bathathe inyathelo mayelana lalokho.
“Lokhe sazalwayo okunje asikaze sikubone. Kulihlazo njalo thina esilabantwana abafunda esikolo kusiphatha kubi.
“Kunje ngilomtwana obhalayo esikolo lesi, nxa esedinga umsebenzi kweminye iminyaka bayabe sebemgcoba ngodaka lwabantwana abenza ukuxhwala okunje,” kukhonona uNkkz Moyo.
Ekhuluma lephephandaba uMnumzana Sethule Mathonsi uthe umphathisikolo kumele athathe inyathelo ngalokhu ngoba ividiyo le iphumele esikolo njalo ilakho ukukhwezela abanye abafundi ukuthi benze njengalokhu nxa izigilamkhuba lezi zingajeziswanga.
“Lo ngumlandu kamphathi. Kumele abafundi laba abakhanya bebancane kangaka njalo belesibindi sokukhupha ividiyo yocansi bajeziswe. Nxa kungenziwanga lokhu abantwana bonke bazaphambaniseka ingqondo,” kutsho uMnu Mathonsi.
UMnumzana Victor Bango oyisikhulumi sesikolo lesi uchazele iphephandaba ukuthi udaba olunjalo lufikile endlebeni zabo kodwa abakabi lobufakazi obubambekayo. Uthe bona njengesikolo bazenza okusemandleni ukukhuza izephulamthetho lezi.
“Amahemuhemu odaba olunjalo siwazwile noma singakabi lobufazi obugcweleyo. Sisachwayisisa ngalo ukuze lathi nxa sithathe amanyathelo silesiqiniseko ngakho. Kodwa izinto ezifana lalezo asifuni zenzakale kithi noma ngaphi elizweni.
“Sizabiza abazali babantwana laba sikhulumisane labo sikhuze abantwana sindawonye ngoba singabazali sonke.
Kunjalo nje sixwaya abazali ukuthi bengavumeli abantwana bebuya labomakhalekhwini babo esikolo kanti lathi siqinisa ukuthi omlindigedi bangavumeli izinto ezinjalo zingena emagumeni ethu,” kugcizelela uMnu Bango.
Online Reporter