Siphakeme .Mnindwa
YiNtatheli kaMthunywa
AMAPHOLISA eZimbabwe Republic Police (ZRP) asexwayise uzulu ukuthi atshiyane lomkhuba wokungenisa amabhele lempahla ezivela kwamanye amazwe ngomkoto ngoba lokhu kulicala.
Isikhulumi samapholisa esabelweni seNkabazwe uInspector Emmanuel Mahoko ukhulume lokhu ngemva kokubotshwa kwabantu abathathu mhlaka 24 Zibandlela, eKwekwe abangene elizweni lamabhele ezigqoko ezingekho emthethweni bevela phandle kwelizwe.
“Silabantu abathathu ababotshwe eKwekwe abatholakala belamabhele ezigqoko alitshumi lane ayesemabhasini eTrip Trans. Babotshwa ngenxa yecala lokwephula umthetho okuSection 38(1), we-Customs and Exercise Act, Chapter 23.02.
“Sabopha uEliaza Ndlovu (35) weMabelreign eHarare, Tinashe Sevenzayi (31) weMagwegwe koBulawayo loDozva Nonita (42) weMabelreign eHarare,” kutsho uInsp Mahoko.
Abathathu laba babotshwa babhadaliswa ifayindi ehlanganisela iUS$800 leZWG$1 812 le ZWG$6 000 okuhambelana lecala lakhona.
“Indaba yokubotshwa kwezigangi ezingenisa impahla ezivela kwamanye amazwe ngomkoto ngumsebenzi owenziwa zingcitshi zamapholisa ezigoqela iCriminal Investigations Department (CID) le Zimbabwe Revenue Authority (Zimra),” Insp Mahoko.
Sikhuthaza abantu bonke abafisa ukungenisa impahla ezehlukeneyo ezivela kwamanye amazwe ezigoqela ezamabhizimusi, ezokusebenzisa ezindlini, ukuthi balandele imithetho ebekiweyo.
“Uhlelo lolu luqhubekela phambili, kubotshwa bonke abephula imithetho yokungenisa impahla okungekho emthethweni kungakhathalekile ukuthi ngubani njalo ulesikhundla siphi empilweni, uyabotshwa kuphela ugwetshwe okuhambelana lecala lakho emthethwandaba,” kutsho uInsp Mahoko.
Online Reporter