marble nkomo
UMTSHADO uqakatheke kakhulu njalo upha abazali labantwana intokozo lenjabulo ngoba phela uhlanganisa imideni emibili iphile ndawonye ngothando.
Minengi imikhuba efundiswa abathetheneyo ngemva kokuba bathathane. Owesifazane ufundiswa imikhuba yokugcina umuzi ngobabakazi ukuze aqinise uthando lomkakhe kanye lokujabulisa obakwabozala.
Kunengi akufundiswayo umntwana oyinkazana osesiyakwenda kugoqela indlela okumele aphathe ngayo umkakhe. Phela indoda ifuna ukutshengiswa inhlonipho ephakameyo kakhulu ukuze ihambe iziphakamisa emphakathini uze uyizwe isithi “abadala balami kambe baze bangikhethela isinqandamathe esihlonipha kangaka esithi singipha ukudla singiguqele njalo sibobotheka”.
Amadoda ayathanda ukuthi nxa esethatha umfazi atshiye imisebenzi avame ukuzenzela yona ngoba phela uyabe esekhona owenza limisebenzi.
Uyezwa indoda ivela emasimini ikhathele ifike izithi votshololo phansi ibize umkayo ukuthi azoyikhupha izicathulo njalo igezwe lodaka lwamasimu.
Inengi labesifazana balezi insuku ngeke bakumele konke lokhu uyezwa besithi “ubona angathi ngalanda ukuzomsebenzela lapha? Ngizamtshiya mina”. Lokhu akwenziwa ngoba indoda yinhloko yomuzi, lokhu kufana phela lokuba yinkosi yomuzi.
Emendweni kufuna isibindi ngoba vele emendweni kunzima, kufuna ukuzimisela okumangalisayo.
Kudingakala ukuthi lo oyendileyo ahloniphe umkakhe aphinde njalo azihloniphe yena ngokwakhe ngoba umuzi udinga inina eligcweleyo elikwaziyo okufanele ukwenziwa lokungafanelanga ukwenziwa.
Lendlela owesifazane agqoka ngayo kumele itshintshe phela nxa esethe wenda. Impahla ezimfitshane lokhu abakubiza ngokuthi yizigcebhezana kuyabe sokumele akubeke khatshana. Kodwa nje kuya ngokuthi abakwabozala bafunani sibili ngoba abanye ngabe simanjemanje abalandaba lempahla egqokwa ngumalukazana.
Umalukazana kumele ahloniphe uninazala loyisezala, nxa umalukazana edelela umuzi wakhe ngeke ume uthi mpo.
Okunye njalo okuqakathekileyo okumele kwenziwe ngumakoti yikusebenza atshengisele ukuthi ungumuntu ofuna ukugcina umuzi wakhe uhlanzekile. Phela umakoti olivila akaze wathandwa muntu ngitsho. Kunengi Mahlabezulu okukhangelelwe ukuthi umakoti akwenze kuthi lamadoda lawo alakho okwabo okukhangelelwe nguzulu nxa esethethe kungakho-ke kuqakathekile ukuthi lo lalo asebenze eyakhe indima ukuze imizi ingadiliki. Phela kubuhlungu nxa umuzi uchitheka kungakho-ke umsebenzi ukulabo abathetheneyo ukuze bagcine imizi yabo iqinile.
Asibonisaneni sizimuli sikhuthaze abantwabethu abangamankazana ngendlela eqondileyo yokuziphatha emendweni, singakhohlwa lokufundisa abesilisa indlela eqondileyo yokuphatha abesifazane emizini yabo.
Peter Tanyanyiwa
Online Reporter