admin
Johas Moyo
INHLANGANISO yeAgritex isicebise abalimi ukuthi baqaphele izilimo zabo zingatshwazwa ngumqando ngoba lokhu kungabangela ukuthi zingenzi kuhle.
UProvincial Agritex Officer weMatabeleland North uMnumzana Davison Masendeke uthe umqando uyingozi kuzilimo kungakho abalimi kumele bazivikele zingakatshazwa ukuze benelise ukuthola inzuzo.
“Abalimi kumele babelolwazi olugcweleyo lokuthi ungqwaqwane uqalisa nini.
“Ulwazi lolu bangaluthola ngokulalela kanye lokudingisisa ngomumo womkhathi. “Lokhu kulakho ukubancedisa ukuthi bahlale belungiselele ukuvikela izilimo zabo kungqwaqwane lo,” kutsho uMnu Masendeke.
Uthe abalimi kumele njalo basebenze duzane labalimisi ngoba le ngenye indlela engabasiza ukuthi banqobe ukutshazwa kwezilimo ngesikhathi somqando njalo kumele balime izilimo ezenza kuhle.
“Sikhuthaza abalimi ukuthi bavuke ngehola lesithathu ekuseni bethelela izilimo zabo. Lokhu senzela ukuthi bakhudumeze izilimo zabo (increase temperature) ngoba izilimo zifuna ukukhudumala ukuze zikhule kuhle.
“Izilimo ngesikhathi somqando ziyaphuza ukukhula kungakho ukuzithelela ekuseni kuyindlela yokuthi kube lesikhudumezi ngesikhathi somqando,” kutsho uMnu Masendeke.
Uqhubeke esithi abalimi kumele njalo babe lendlela yokuvimba umoya ukuze izilimo zingatshazwa kakhulu.
“Sikhuthaza abalimi ukuthi bakhe uthango oluvimba umoya. Lokhu kumele bakwenze ikakhulu bekhangele icele lapho umoya ovela khona,” nguMnu Masendeke lo.
Uphethe ngokukhuthaza abalimi ukuthi bahlale behlola izilimo zabo ekuseni lantambanma ngoba kuyabanceda ukuthi benelise ukubona izibungu lemikhuhlane ehlasela izilimo kusesemasinya.
Online Reporter