Tongai Mashonga
IMIDLALO yeligi ephakemeyo, iPremier Soccer League ingadlalelwa eGwanda ngo2027, nxa iqembu leBlanket Mine lingaqinisela kulimpelaviki.
NgeSonto umdlalo ophakathi kweBlanket Mine leKwekwe United enkundleni yeBaghdad ukhangelelwe ukuba ngowokunquma umjaho wokuthatha isicoco seligi yeCentral Region Soccer
League, njengoba sekusele imidlalo emibili kuphela ukuthi isizini iphele.
IBlanket Mine, ehlezi phezulu kungalane ingakaze yehlulwe kuligi, izangena enkundleni ilwisana
leKwekwe United esendaweni yesibili, emdlalweni lapho amaqembu womabili efuna imiklomelo eqakathekileyo.
Kodwa umdlalo lo ulendaba ekhethekileyo kumqeqetshi weBlanket Mine uLuke Petros, obuyela enkundleni yeBaghdad lapho aqala khona uhambo lwakhe lwebhola njengomdlali.
UPetros waduma engumgadli weLancashire Steel FC, lapho athakazelelwa khona ngenxa yamandla akhe phambili. Waze waphiwa ibizo lokuthi “Midlands Destroyer”, njalo inkundla yeBaghdad yayisiba yindawo eyesatshwa ngamaqembu aphikisana leLancashire Steel ngesikhathi sakhe.
NgeSonto uzabuyela kuleyondawo engumqeqetshi, kodwa khathesi ezama ukuncedisa iBlanket
Mine ukuthi ithole imiklomelo emithathu angayisondeza ekuthatheni isicoco lokuthola isikhundla sokudlala kuPremier Soccer League (PSL).
Okunye okwenza umdlalo lo ube ngowokulindelwa yikuthi abalandeli ababemkhuthaza uPetros ngesikhathi edlala bazabe sebesekela iKwekwe United.
Umqeqetshi weKwekwe United uTendai Chikuni uthe iqembu lakhe kalikalahli ithemba lokuthatha isicoco, lanxa iBlanket Mine ilokhe iphambili.
“Ngithi umdlalo usaqhubeka. Umehluko wemiklomelo ubukade umkhulu, kodwa sesiwunciphisile. Okumele sikunanzelele yikuthi singazithembi kakhulu,” kutsho uChikuni.
I-Kwekwe United, eyaziwa ngelithi Yepamoyo, ithole ithuba lokusondela kuBlanket Mine ngeviki edluleyo ngemva kokuthi izimbamgodi zegolide eGwanda zidlale ngokulingana kungela 0-0 leShurugwi FC esilwela ukuthi ingehli kuligi.
IKwekwe United isebenzise ithuba leli ngokunqoba iGrain Tigers nge 1-0, yanciphisa isikhala semiklomelo, sisuka kweyisikhombisa kusiya kwamahlanu, sekusele imidlalo emibili.
IBlanket Mine ihlezi phezulu kwengalane ilemiklomelo engu-78 emidlalweni engu-32. Isinqobe imidlalo engu-23, yadlala ngokulingana kwengu-9 njalo ayikaze yehlulwe, ile-goal difference ye-+43.
IKwekwe United ile-73 emidlalweni engu-32, isinqobe engu-22, yadlala ngokulingana kwengu-7 njalo yehlulwa kathathu. I-goal difference yayo yi-+37.
IBlanket Mine idinga ukunqoba eBaghdad ukuze ithathe isicoco sekusele umdlalo owodwa, kodwa iKwekwe United kumele ithole yonke emithathu ukuze iqhubeke ilethemba lokuphakamisa isicoco njalo igcine iphupho lokubuyela kuPSL liphila.
Nxa iKwekwe United inganqoba, izabe isilindele ukuthi iGood Morning FC iyenzele umsebenzi ngokunqoba iBlanket Mine eSabiwa Stadium emdlalweni wokucina wesizini.
IKwekwe United yona izahamba iye eBeitbridge lapho ezadibana khona leVhembe Stars Academy FC, esanda kungena kuligi njalo elwela ukuphunyuka ekwehleni esigabeni esilandelayo.
UChikuni uthe iqembu lakhe lizaqhubeka lilwela isicoco kuze kube lilanga lokucina.
“Kwathi sidlala ngokulingana leShurugwi FC kwaba lokudideka okukhulu, kodwa layo idlale ngokulingana leChapungu leBlanket. Amanye amaqembu khathesi alwela ukuphunyuka ekwehleni kuligi, kuthi amanye alwela isicoco.
“Umjaho wesicoco ulokhe uqhubeka njalo sizakwamukela ukuthi sehlulekile kuphela nxa isizini isiphelile. Silungiselela umdlalo ngamunye ngesikhathi sawo. Sehlulwa yiBlanket kuhlandla
lakuqala, kodwa kasikaze sehlulwe emidlalweni yesigaba sesibili sesizini. Ngihlala ngitshela abafana ukuthi bahlale begxile emdlalweni kuze kuphele isizini,” kutsho uChikuni.
Imidlalo ekhona kuCentral Region
Kwekwe United v Blanket Mine (Baghdad), MSU v Sabi Gold Mine (MSU Grounds), Gwanda Pirates v Grain Tigers (Long John), Super Strikers v Shurugwi (Sabiwa), Chapungu FC v Tongogara Ascot), West Nicholson FC v Matobo (Phelandaba), Dulibadzimu United FC v ZRP Gwanda (Dulibadzimu), Good Morning FC v FC Platinum U19 (Kotamai), Shabanie Mine v Vhembe Stars Academy (Maglass)
