admin
YiNtatheli kaMthunywa
AMAGAGASI e-radio awafiki kwezinye indawo zemaphandleni, osekudale ukuthi eyinye inhlanganiso yabasakhulayo incedisa abantwana besikolo ngokubapha ulwazi esigabeni seLupane mahala.
Ngesikhathi izikolo zivaliwe ngenxa yeCovid-19, uHulumende uphawule izifundo emsakazweni ukuze abantwana besikolo behlale besehlelweni lwezifundo besemakhaya.
Kuyaziwa ukuthi loba amagagasi efinyelela, zikhona imuli ezingelazo izigxingi zama-radio kumbe omakhalekhukhwini. Lokhu kutshiya abanye abantwana besemuva ezifundweni.
I-Catch Them Young, okuliqula elifundisa abantwana esiqintini sikaWadi 15, lenze izifundo zamahala ngalesi isikhathi izikolo zivaliwe ngenxa yeCovid-19 kulindawo kodwa libika ukuthi akulula ukuqhuba lumsebenzi ngokusilela kwezinto. Inhlanganiso le ibika ukuthi ithole impahla ebalisa ama-sanitiser, ingwalo lokunye okubalulekileyo kwezemfundo.
Lama-radio ayafuneka. Kungxoxo lentatheli, iCatch Them Young ithe idinga ukuphathiswa ukuze ivulele abasakhulayo amathuba empumelelo. Okumqoka ngama-rediyo, ingwalo, ama-sanitiser, lama-mask. Kubikwa kuWadi 15 lakwezinye indawo eLupane, abantwana besebetshonela ukudlala ngoba kungela abangakwenza ezifundweni.
Isikhulumi seCatch Them Young uMnumzana Thando Nyoni uthe bathintwa yisimo sabantwana, bakubona kungcono ukuthi bancede.
“Sincedisa abantwana abasezikolo ngezifundo. Ngenxa yokunanzelela ukuthi inengi labo lihlala lizidlalela nje, sabopha iqhinga lokuvula amakilasi,” kutsho uMnu Nyoni.
Uthe benelisa ukuqhuba izifundo okwamaviki amalutshwane ngoba sebesilela ngama-sanitiser lempahla ebalulekileyo ekuvikeleni iCovid-19.
UMnu Nyoni uthe balokuthaba ngokuhlanganela lezakhamizi kulindawo esezincedise ngokuthile ukuze izifundo ziqhubeke.
Online Reporter