admin
YiNtatheli kaMthunywa
ABADLALI beNetball bazakuthi ukulinda okwesikhatshana ukuze babuyele enkundleni kodwa abanye babo labaqeqetshi sebeqalisile ukulungiselela imidlalo.
Abaqeqetshi, onompembe labadlali abafika amatshumi amane lane bahlangane koBulawayo bedinga ukulolongwa ingqondo kucubungulwa ngenhlelo zalumdlalo koBulawayo.
Njengayo yonke imidlalo, umdlalo wokuqaga wamiswa kusenqabelwa ukumemetheka kwegcikwane leCovid-19 ngoMbimbitho. Umdlalo we-Netball kubikwa ungeminye yemidlalo esengozini ephezulu yokugcwalisa iCovid-19, ngakho ukuqalisa kwawo kusakhatshana.
Umhlangano wokudinga ulwazi lo uqoqwe yinhlanganiso yeZimbabwe Netball Association koBulawayo enkundleni ye-Raylton Sports Club.
Abaqoqi bawo batshele iphephandaba likazulu ukuba sebevuthiwe inhloso ibingeyokuthi babonisane ukuthi umdlalo ungaqhubeka njani.
Ukuvuselela lumdlalo obusuwile koBulawayo bekumqoka emhlanganweni, ngokutsho kukamgcinisihlalo we-Zina koBulawayo uJoseph Nkomazana.
“Konke kuhambe kuhle, sizama ukuthi sivuselele umdlalo ngemva kwesikhathi sivalelwe yiCovid-19. Bekulabantu abangu-42, kuhlangene abadlali, onompembe labaqeqetshi lapho esigxile khona ngeCovid-19 sidinga amacebo wokuqhubeka,” kutsho uNkomazana.
UNkomazana uthe izifundo ezitholwe lapho zitshiye wonke umuntu eseledlabuzane lokuncedisa ukuthi umdlalo wokuqanga uphakame.
“Izifundo zincedise kakhulu. Siyabelane ulwazi, sabonisana indlela okumele sizilandele uma sizaphenduka enkundleni,” nguNkomazana lo.
Kubikwa kube ngumbono wabanengi ukuthi abadlali labaqeqetshi bathole ukusekelwa ekutholeni ulwazi.
“Abantu bafuna ukufunda ngakho ngesikhathi sisamelele ukuqala kwemidlalo, sizaqhubeka sifundisana.”
Zinengi inhlelo ebeziphawulwe yiZina lonyaka ezibalisa ukusungulwa kweligi ka-Division Two koBulawayo.
Iligi ka Division Two kubikwa izadlalelwa ngamaqembu la ayehluleke ukudlala kuligi enkulu.
Online Reporter