admin
Thokozile Mbedzi
UMELI wedale leBeitbridge East uAlbert Nguluvhe kuviki edluleyo usize abantu besigabeni lesi abaphila le-albinism ngamafutha okugcoba abavikela elangeni.
Abantu abaphila le-albinism basebenzisa amafutha akhethekileyo akhangelelwe ukubavikela ukuthi ijwabu labo lingahlukuluzeki ngenxa yokutshisa.
UMeli uNguluvhe uveze ukuthi wananzelela ukuthi abantu laba balendingeko enkulu kodwa kabenelisi ukuthi bathole impahla abayidingayo.
“Ngesikhathi ngiqhuba imisebenzi eyehlukeneyo esigabeni nginanzelele ukuthi lapha kuyatshisa kakhulu ngakho ukutshisa lokhu kucina kuhlukuluza abanye bethu abaphila le-albinism ngoba ijwabu labo kalifuni kutshisa.
“Kungakho ngibone kufanele ukuba ngibancedise ngamafutha abo akhethekileyo okumele bawagcobe abavikela ekutshiseni kwelanga. Amafutha la bangawagcoba bayenelisa ukuhamba bekhululekile njengabantu bonke,” kuchaza uNguluvhe.
“Umuntu munye ngamunye ngimnike amambodlela amafutha amabili ama 200mls. Ngibona angathi uhlelo luzakuya phambili ngoba labanye engiphathisana labo emsebenzini baluthakazelele ngakho ngibaphe amambodlela angaba yi-300 ngoba befuna ukuphathisa abantu abaphila le-albinism ezigabeni zabo labo.
Uqhubekele phambili esithi uhlelo lolu ufuna lukhule banikwe ngitsho lemphahla ezifana lengwane zelanga kunye lama-umbrella.
“Uhlelo lolu luzaqhubekela phambili ngoba ngifisa ukuba kube lezingwane zelanga kunye lama-umbrella ngoba konke lokhu kubaphathisa ukuba imizimba yabo ihlale isesimeni esihle.” Uphethe ngokuthi ukhuthaza abantu bonke abaphila le-albinism esigabeni sakhe ukuthi bavele ukuze benelise ukubaphathisa.
Online Reporter