YiNtatheli kaMthunywa
INHLANGANISO yomanyano wamazwe omhlaba eyezemfundo, isayensi lamasiko (i-UNESCO) iqhuba uhlelo lokuqeqetsha amantombazana kuzifundo zesayensi, imitshina yakulezinsuku, ezabomanjinela kunye lenombolo (STEM) ngenhloso yokuwavulela amathuba.
Uhlelo lolu, luqhutshwe esikolo seTshebetshebe Primary koBulawayo njalo seluqoqe abafundi abangamantombazana angu-100 abavela ezikolo ezinhlanu eziseMatabeleland North, Matabeleland South lakoBulawayo.
Ababalisi labo bahlanganyele emhlanganweni lo wokuthuthukisa indlela yokufundisa engabandlululi ngobulili, ikakhulu ezifundweni ze-STEM, ukuze abafundi abangamantombazana labo bathole amathuba afana lawabafana.
Umhloli wezikolo zeNon-Formal Education esabelweni sakoBulawayo, uNkosikazi Sibusisiwe Mpofu, uthe uhlelo lolu luqondiswe ekuqiniseni amantombazana lokuwanceda ukuthi athole ulwazi oluzawavulela amathuba kumsebenzi yethekinoloji.
Uthe kuqakathekile ukuthi ababalisi labo bathole ulwazi lokufundisa ngendlela ekhuthaza amantombazana ukuthi angasaleli emuva ezifundweni ze-STEM.
Umbalisi wezifundo ze-robotics, uMnumzana Thandazani Vella, uthe abafundi baqalise ngokufundiswa ukuhlanganisa izimota ezisebenza ngobuchwephetshe be-robotics.
Uthe izimota lezi zenzelwe ukuthi zilandele iziqondiso, zibone izinto eziphambi kwazo njalo zenelise ukuzivika zingaqondiswa ngumuntu.
UMnu Vella uthe ukufundiswa kwe-robotics ezikolo kuzanika abafundi ulwazi olufunekayo emhlabeni njengoba impilo iqhubeka iguquka ngenxa kokusetshenziswa kwe-Artificial Intelligence (AI).
Uthe ulwazi lolu luzathuthukisa ukucabanga, ukuxazulula inhlupho lokuqamba izinto ezintsha, okuyikho okuqakathekileyo ekuthuthukiseni ilizwe.
Uhlelo lolu luhambelana lombono weVision 2030 kanye lecebo lokuthuthukisa ilizwe ngokusebenzisa ulwazi, ubuciko lemitshina yakulezinsuku ukuze kwakhiwe iZimbabwe ethuthukileyo.
