Online Reporter
Zimpapers Sports Hub
IQEMBU leHighlanders lingene umango wokuya eKariba litshiye abadlali balo ababili uTalent Dube loGillian Nyathi abalamanxeba okulimala emdlalweni wabo weligi odluleyo bedlala leFC Platinum enkundleni yeBarbourfields.
IBosso izadlala leZPC Kariba eNyamhunga Stadium ngoMgqibelo.
UDube, owayeqalise kulumdlalo, wakhitshwa ngomzuzu wesi-66, ikanti uNyathi wayesebhentshini.
Ekhuluma ngaphambi kokusuka kwabo beqonde eKariba ngoLwesine, umqeqetshi weqembu leHighlanders uKelvin Kaindu uNyathi loDube yibo bodwa abadlali abalimeleyo.
“Singena umango kuliviki. Kumalungiselelo ethu, udaba olusikhathazayo ngolokulimala kukaTalent loGillian akade beyingxenye yeqembu emdlalweni odluleyo. Abakho kuqula labadlali esibakhethileyo kumdlalo ozayo,” kutsho uKaindu.
UKaindu uthe uhlezi esazi ukuthi balande iqembu elingavumi kalula ukunqotshwa enkundleni yalo.
“I-ZPC Kariba idlala kuhle kulisizini. Lakusizini edluleyo benza kuhle. Bayahlohla njalo bawugcinile umdlalo wabo. Sidlalela enkundleni yabo, akukho lula. Okungcono yikuthi khathesi singene umango ngesikhathi sokugodola, angeke sikhale ngobuhlungu bohambo lokutshisa kwelanga, okwandise ukuba lomthelela ekudlaleni kwethu eKariba,” kutsho uKaindu.
I-ZPC Kariba kayikanqotshwa enkundleni yayo kulisizini. IHighlander isinqobe kanye isemangweni.
