admin
YiNtatheli KaMthunywa
IQEMBU leHighlanders lizabukisa imbali yayo lokugcizelela ukuthi ngempela liyithimu yezwe lonke kumbukiso weTrade Fair ngeviki ezayo.
IHighlanders ithakazelela iminyaka engu-90 ikunguqu. Ukubukisa kuZimbabwe International Trade Fair kungeyinye yamadili aqoqwe ukuthi kuthakazelelwe iminyaka yonke le iBosso idlala inguqu.
Umaqhuzu walithimu uNdumiso Gumede ubikele uMthunywa ukuthi bazizwa bejabulile ukuthi iHighlanders ibukise okwakuqala kumthimba wabosomabhizimusi lo.
“Njengoba siyithimu endala kulazo zonke, sithe thina kumele sibonakale emphakathini ngokubukisa kuTrade Fair.
IHighlanders yithimu esileminyaka engu-90, ithimu eyasungulwa ngo-1926 ngabantwana beNkosi uLobengula uAlbert loRhodes.
“Kunengi okuhleliweyo sithakazelela iminyaka engu-90. Ukubukisa eTrade Fair yikusondelela abasekeli bethu, osomabhizimusi kanye lokubonisa ukuthi iqembu likhokhelwa njani. Ibhola lakulezinsuku libhizimusi ngakho kufanele ukuthi sibelapho,” kutsho uGumede.
Kusenjalo lenhlanganiso yePremier Soccer League izabukisa eTrade Fair okwesibili iminyaka ilandelana.
Kumbiko othunyelwe uMthunywa, iPSL ibika ukuthi ukubukisa kuTrade Fair le kuzenza kubelula ukuthi inhlanganiso yenguqu ikhulumisane labasekeli bomdlalo, osomabhizumusi lezinye ingatsha zamankampani ezilesifiso sokusebenzelana layo.
Online Reporter