admin
Nkosilathi Sibanda
IQEMBU leHighlanders nxa selidinga iqhinga elitsha lokunqoba, lilakho ukuthola abadlali abangalihlohlela ngcono kuqembu leTafic Sporting kweleBotswana.
Inkokheli zeTafic Sporting bezivakatshele inkokheli zeBosso kuliviki lapho okuphume khona ukuba amaqembu womabili angaqala ukutshintshana abadlali.
Ekhuluma ngemva komhlangano umgcinisihlalo weTafic Sporting u Carlos Sebina uthe kuzatshintshwana abadlali kumaqembu womabili kwelakusasa.
“Kungenzeka kube lokuthengiselana kwabadlali. Abanye abadlali bethu bazadlala kuHighlanders njalo layo iHighlanders ilakho ekufuna kithi, sizancedisana,” kutsho uSebina.
Izethekeli zeBotswana zibe lomhlangano lequla lenkokheli zeBosso ezibalisa umgcinisihlalo uKenneth Mhlophe, umaqhuzu uNhlanhla
Bahlangene Dube lomgcinincebo uDonald Ndebele.
Iqula leTafic beliphethe umgcinisihlalo weqembu uCarlos Sebina, umsekeli kanobhala uMonty Mothibi, umaneja omkhulu uChristopher Ollyn lomeli wekhomithi uTarcisius Mudongo.
UMhlophe uthe iqembu leHighlanders lilembali enhle elakho ukuthi isetshenziswe ekwakheni ubudlelwano lamanye amaqembu e-Africa.
“Umhlangano wethu leTafic Sporting ubemuhle sibili njalo usivule amehlo. Ngilokuthaba ukuthi ibizo lophawu lwethu njengeHighlanders kuyakhanya ngoba amaqembu afuna ukusondelela kithi, kube lobudlelwano,” kutsho uMhlophe.
“Imbali yeHighlanders yiyo edala ukuthi amanye amathimu afise ukuthi azi ngcono ngaleliqembu. Sifuna ukuthi ubudlelwano bethu leTafic Sporting befike ibanga laphezulu.”
Umgcinisihlalo weTafic Sporting wengeze ngokuthi isiqokoqela sokuvakatshela iBosso bekuyikukwakha ubudlelwano lokufunda.
“Umhlangano lo uqinise ubudlelwano phakathi kweTafic leHighlanders. Besizothapha ulwazi, sifuna ukubona indlela zokukhokhela iqembu. Kwelakusasa ubudlelwano lobu buzakhula.”
Online Reporter