admin
Wayne Ncube
IKHABITSHI yisilimo esivumayo yiloba yisiphi isikhathi somnyaka njalo iyavuma enhlabathini etshiyeneyo, kungakho abalimi bangayilima amabhizimusi abo angathuthuka masinya.
Intatheli kaMthunywa ikhulumisane loMnumzana Raphael Ncube oyingcitshi kwezenhlanyelo kunhlanganiso yeFarm and City Centre uthe abalimi kabalime ikhabitshi ngoba iyisilimo esingakhethi umkhathi, inhlabathi njalo siyathuthukisa isikhwama somlimi.
“Ikhabitshi ayilamsebenzi omkhulu ekuyilimeni, idinga ukunakekelwa kuhle, ukuthi umlimi abelolwazi lokuyivikela ezibungwini ukuze ikhule kuhle.
“Okuhle ngokulima ikhabitshi yikuthi ilomkambo obanzi ngoba iyisitshebo esitshiphileyo, abanye njalo benza ngayo umfushwa omnandi, umnyaka uqala uze uyephela abantu bezidlela ikhabitshi nsuku zonke ngakho ngeke abalimi bangatholi inzuzo enhle bengalima ikhabitshi yabo kuhle,” kulandisa uMnu Ncube.
Uqhubekele phambili esithi ekulimeni ikhabitshi kumele umlimi enze isiqiniseko sokuthi umhlabathi wakhe ulokudla njalo umanzi.
“Ikhabitshi yisilimo esidinga ukudla okunengi ngakho kumele silinywe emhlabathi ovundileyo kakhulu. Kumele njalo sithole amanzi ukuze sikhule masinya.
“Siphinda sibe yisilimo esihlaselwa yizibungwana, njalo ezinengi zakhona zihlasela impande kanye lamahlamvu ngakho kudingakala ukuthi umlimi ahlale elemithi yokufafaza.
“Ungabona ikhabitshi yakho isiba lehlamvu elilombala olithanga lisuse lelohlamvu ngoba kungumkhuhlane ozathelela enye.
Uphethe ngokuthi umlimi kumele ahlakulele ikhabitshi yakhe ngemva kwesikhatshana ukuze ukudla kungene phakathi esilinyweni,” kuphetha uMnu Ncube.
Online Reporter