IMIGIDO YESINTU ezikolo

. . . Abafundi kabafundiswe kabanzi ngemigido yesiNtu

YiNtatheli kaMthunywa
USIBALUKHULU okhangele ngezemfundo esigabeni seNkayi uMnumzana Philip Dlamini usekhuthaze ababalisi ukuba bafundise abantwana imigido yesintu ukuze kulondolozwe amasiko.
UMnu Dlamini ukhulume lokhu ngoLwesine kuviki edluleyo ngesikhathi kuthakazelelwa umkhosi wokunanzwa kwamaxhaphozi eNkayi.

Kubikwa abantwana kabasakwazi ukugida imigido yesintu okuyinto engacina isitshabalalisa amasiko.

“Abantwana kumele bafundiswe kabanzi ngokugida imigido yesintu ebalisa ingquzu kunye lesitshikitsha. Imigido le yayigidwa ngokhokho endulo bezithokozisa.

“Njengoba abantwana bezikolo bezinkokheli zakusasa kuqakathekile ukuba bafunde ukugida imigido le. Okhokho babezilibazisa ngokugida ikakhulu nxa kuthethelwa kumbe nxa kulombuthano othile ngakho lathi kumele sifunde kubo ukuze amasiko ethu engalahleki,” kuchaza uMnu Dlamini.

Uthe kuqondile ukuthi abantwana bafunde imigido yakwamanye amazwe kodwa banganamatheli kuyo.

“Kuqakathekile ukuba sifunde amasiko ezinye izizwe kodwa akumelanga silahle awethu sinamathele kwawabanye. Isizwe yisizwe ngamasiko aso ngakho lathi njengenzalo yeZimbabwe asiqakathekiseni amasiko ethu ngemigido yesintu,” kuphetha uMnu Dlamini.

Embuthanweni lo abantwana bezikolo kunye labazali bafundiswe ngokuqakatheka kwemvelo langokuyisebenzisa ngendlela eqondileyo.

“Abantwana kumele bafundiswe njalo ezikolo ngokulondoloza imvelo. Imvelo iyasiphilisa ngokusinika ukudla, umoya ohlanzekileyo kunye lokunye okutshiyeneyo ngakho wonke umuntu ulomlandu wokuyisebenzisa ngendlela efaneleyo,” kutsho uMnu Zimbabwe Ndlovu oyisisebenzi sekhansili yeNkayi.