admin
Nkosilathi Sibanda
IHIGHLANDERS akusamelanga ikhale ngenkundla yokulolonga mhla imidlalo iqalisa ngoba isithole impompi zokuthelezela inkundla esizegcekeni leClubhouse.
Iqembu lakoBulawayo leli libika ukuthi kunsuku ezilandelayo lizaqhubeka ngokuhlanyela utshani ukuze lilungiselele ukuvuselelwa kwenkundla lezi.
Sekuyiminyaka iBosso isehluleka ukulungisa inkundla zayo, ibeka isikhalazo sokuthi ayilamali yokuthenga impompi ezintsha. Impompi ezikhona ngezakudala njalo azisebenzi. Kuliviki kuzwakale ukuba ithimu le idinge usizo yaluthola, olokulungisa impompi eyodwa.
Ukuvuswa kwempompi kubonakale kulinyathelo elizakwehlisa indleko zeqembu nanko belibhadala inqwaba yamadola iseboleka inkundla zokulolonga endaweni ezitshiyeneyo koBulawayo.
Isikhulumi seHighlanders uRonald Moyo wazise intatheli le ukuthi kuzaphutsha inyanga ezine kulungiswa inkundla.
“Sesifake impompi enkulu. Senze konke okufaneleyo okubalisa ukuhlolisisa i-pressure yalimpompi lokukhangelisisa ubunengi bamanzi engawadonsa,” kutsho uMoyo. Uthe bacabange ukuthi bame kancane ukuhlanyela utshani belinde ukubona ukuqina kwempompi le.
“Kumele siqale sisuthiseke ngempompi andubana sihlanyele utshani. Ukuhlanyela singazi lesilinganiso samanzi kuyabe kuyikudlala ngesikhathi.” Kubikwa leliqembu libhadale ikhansili yakoBulawayo i$380 000 ukuze kuqhutshwe lumsebenzi wokuvuselela inkundla.
Online Reporter