Online Reporter
Nkosilathi Sibanda
UMPHATHINTAMBO wogatsha lwe-Environment, Climate and Wildlife uDokotela Evelyn Ndlovu, uncome izakhamizi zesiqintini ze-Isla Village 2 Community Garden eseMatetsi, eHwange ngokuzimisela kwezokulima lokulondoloza imvelo.
Uthe umsebenzi wokulima kulesi isivande uyisibonelo esihle sentuthuko.
Iphurojekithi le eqhutshwa ngumphakathi ilosekelo lwenhlanganiso ye-International Fund for Animal Welfare
(IFAW) le-Zimbabwe Parks and Wildlife Management Authority (ZimParks).
Isivande lesi siphakamisa imuli ezihlala endaweni ezilomhlabathi owomileyo eMatabeleland North ukuthi zithole ukudla lemali yokuziphilisa, ngesikhathi esifanayo kunciphisa ukuzingelwa kwenyamazana okungekho emthethweni.
Kubikwa kuphinda kwehlise ukungezwani phakathi kwabantu lenyamazana.
Ekhuluma ngesikhathi evakatshele iphurojekithi le ngeviki edluleyo, uDkt Ndlovu uthe imisebenzi eqhutshwa ngumphakathi iqakathekile ekuvikeleni imvelo lokuphakamisa impilo zabantu.
Uthe isivande lesi sesinika imuli ukudla lemali yokuziphilisa, okwenza abantu bengasathembeli ekuzingeleni inyamazana ngokungekho emthethweni.
UMphathintambo uDkt Ndlovu uphinde wancoma ukufakwa kwesibholane esisebenzisa amandla elanga, ebika ukuba lokhu kuqinisa indlela zokulima ezihambelana lokuguquka komkhathi njalo kuqinisekisa ukutholakala kwamanzi umnyaka wonke endaweni ejayele ukuhlaselwa yikusilela kwezulu.
“Iphurojekithi le ihambelana lenhlelo zikaHulumende zeVision 2030 leNational Development Strategy 2 (NDS2), ezihlose ukuthuthukisa impilo zabantu lokukhulisa umnotho welizwe ngendlela eqhubekayo.
“Ngikhuthaza abanye kwezinye indawo elizweni ukuthi balandele isibonelo seMatetsi ngokusungula amaphurojekithi afanayo.
“Kasingabi ngamavila, asisebenzeni sakhe ikusasa elihle. I-Isla Village 2 Community Garden kukhangelelwe ukuthi iqinise umsebenzi wokuvikela imvelo njalo ithuthukise impilo zemuli ezihlala eHwange,” kutsho uDkt Ndlovu.
