admin
YiNtatheli kaMthunywa
KULENKOMO ezifika i-16 000 esezifile ngenxa yendlala esabelweni seMatabeleland South, ngesikhathi kulokwesaba ukuthi kungaba lokusilela kwamanzi kwezinye indawo ezisesabelweni lesi nanko phela imithombo yamanzi isisoma.
Kumbiko ekhutshwayo isigaba seBeitbridge yiso esihlaselwe kakhulu esabelweni seMatabeleland South njengoba sekufe inkomo ezedlula i-4 000 kukanti eBulilima sekufe ezingu-2 697, Gwanda (2 569), Insiza (2 367), Matobo (1 736), Mangwe (1 434) kukanti eMzingwane kufe 390.
UDokotela Enat Mdlongwa onguMatabeleland South provincial veterinary officer, uthe inani lenkomo esezibulewe yindlala sezedlule i-16 000 njalo ziqhubeka zisifa.
Inkomo ziyafa, isimo sibi njalo nxa sikhangela imbiko esilayo sekulenkomo ezifika phose i16 000 kodwa ziyedlula lapho ngiyakwazi lokho, utsho njalo.
UDkt Mdlongwa uthe njengendlela yokuphathisa, abalimi kumele behlise inani lezifuyo abalazo njalo baqhubeke bezithengela ukudla.
“Sikhuthaza abalimi ukuthi bazilimele ukudla kwezifuyo zabo okulingeneyo njengoba kwezinye indawo izulu like lana ukuze izifuyo ezincane zithole ukudla, utsho njalo.
UHulumende usekhethe isabelo seMatabeleland ukuze kugxilwe kuyo ekuvuseleleni umhlambi welizwe kanye lokuthuthukisa uhlonzi lwezifuyo ngokusebenzisa uhlelo lweSpecial Livestock, Fisheries and Wildlife Programme olwaziwa ngokuthi yiCommand Livestock eyasungulwa kuminyaka emibili edluleyo.
IMatabeleland South ilenkomo ezedlula i600 000 kukanti iMatabeleland North ilezedlula i-500 000 kukanti umhlambi welizwe ufika phose i5 miliyoni.
Online Reporter