admin
Ethel Ncube
KULENDLAMANZI yesiqintini seBumbi eGokwe emiswe emthethwandaba weGokwe isetheswa icala lokubhaxabula ipholisa lokuvalela elinye esitokisini ngoba ingafuni kuvalwe ibhawa.
Umsolwa uBelieve Mhike, obenatha eJiminya Nite Club umiswe phambi kukamantshi uMnumzana Henry Ndlovu esetheswa icala lokutshaya ipholisa.
Umtshutshisi kulelicala uMnumzana Romeo Zibani utshele inkundla ukuba mhlaka 4 Lwezi amapholisa ayebhoda endaweni yamabhizimusi afica ibhawa yeJiminya ivuliwe asetshela umnikazi ukuthi kavale okwacunula uMhike walanda elinye lamapholisa la wathi ufuna ukubona incwadi zalo andubana alihluthunele imvubu yalo alibhaxabule ngayo.
Kubikwa waphinda njalo wadobha ilitshe wamjikijela ngalo esihlathini.
Kubikwa eqeda ukwenza lokhu wabaleka kodwa wasebotshwa wayavalelwa enkambeni yeNembudziya.
Kubikwa ngesikhathi uMhike evalelwe enkambeni mhlaka 7 Lwezi waphinda njalo watshaya elinye ipholisa elaliphathele izibotshwa ukudla.
Esenze njalo kubikwa waphinda wathathela lelopholisa izihluthulelo zesitokisini wavalela lelopholisa phakathi.
Umantshi udlulisele phambili ukuthoniswa kwecala leli kumhlaka 3 Mpalakazi.
Online Reporter