adminYiNtatheli kaMthunywa
IBULAWAYO Christian League egoqela amaqembu enguqu aphuma kumabandla okholo koNtuthu isivule i-website ezakwenza kubelula ukuthi amathimu labasekeli bathole imbiko ngokuphangisa.
Inhlanganiso yeBulawayo Christian League (iBCL) idibanisa amathimu amabandla adlala inguqu lomdlalo wokuqaga.
Ngokuvula ubulembu be-website ethi www.bulawayochristianleague.org <http://www.bulawayochristianleague.org>, iBCL ibika ukuthi isifuna ukuthi iligi yemidlalo yayo ithole usekelo lokuthi kubonakale ukuthi amabandla akoBulawayo alakho ukuthi adlale inguqu ehlelekileyo.
Umngcinishlalo weBCL uTimothy Mandizadza ubikele iphephandaba likazulu ukuthi ukuvulwa kwe-website yabo sekuzakwenza imidlalo yabo ibesemlonyeni yabathandi bomdlalo.
“Silokuthaba ukubikela uzulu ngalokhu esesikwenzile. Inhlanganiso yethu ephethe inguqu yamabandla okholo lwesiKristu lapha koBulawayo isivule i-website. Kubulembu lobu, simumuthe yonke imbiko ephathelane lokudlalwa kwenguqu yethu yabafana lokuqaga kwamantombazana.
“Besingeke sisalele emuva kwezokuxhumana lokuhamba kwembiko. Abasekeli, amathimu lalabo abadinga ulwazi ngesikwenzayo bazavula i-website le ukuze bathole konke okuphathelane lenguqu yethu,” nguMandizadza lo.
Phezulu kwezinye inhlelo zokumemethekisa inguqu, inhlanganiso yeBCL ibika ukuthi isiqoqe umhlangano wokuhlolisisa ulwazi lwabaqeqetshi labokaputeni bamaqembu omdlalo webhola lokuqaga.
Izifundo lezi ziqoqwe yiBCL ibambene lenhlangananiso yeZimbabwe Netball Umpires Association.
“Injongo yikukuhlolisisa abaqeqetshi labokaputeni bamaqembu omdlalo wokuqaga lowenguqu. Sifuna lokuthi bakwazi njalo lemithetho eqakathekileyo eyandise ukuphica abanengi kumidlalo le.”
Uqhubekele phambili wachaza ukuthi amalunga eZimbabwe Netball Umpires Association aphathise kakhulu ngokuphawula ulwazi.
Uveze ukuqakatheka kwalo umhlangano lokuthi kuzayinceda njani iBCL.
“Lokhu kuzasisiza ekuthini abaqeqetshi labokaputeni bazaqala ukuzwisisa ezinye izinqumo ezenziwa ngonompembe.”
Impumela yemidlalo yenguqu:
Mpopoma Nazarene 1, House Of Grace 0; House Of Prayer 0, High Point 4; Word Of Life Nkulumane 3, Sangano RevaPositori 6.
Uluhlu lwamathimu omdlalo wokuqaga azadlala kulimpelaviki:
Gwabalanda v Gold Reef, Howmine v Lobengula, Nust v Baker’s Inn, CAAZ v Catholic.
Online Reporter