adminUmkami ufuna omunye umntwana
NGITHEMBA uziphilele Khulu. Ngingumama oleminyaka engu-30 yokuzalwa, ngendile njalo ngilabantwana abathathu abafana bodwa. Khulu uhlupho lwami yikuthi umntanami omncinyane ulomnyaka owodwa kodwa sengithwele nzima ngoba umkami uthi sefuna selamise ngoba ufuna umntwana oyintombazana.
Mina-ke ngahlatshwa ijekiseni yokuthi ngingazithwali kuminyaka emibili elandelayo kodwa yena kangizange ngimtshele ngakho lokhu. Kungakho usesithi siye esibhedlela siyekuzwa ukuba kungani ngingazithwali. Okunye okuhluphayo yikuthi uthi nxa ngingala kutsho ukuthi kukhona engakwenzayo ukuze ngingamzaleli umntwana oyinkazana.
Uthi nxa kukhona engakwenzayo usefuna ukulobola omunye unkosikazi. Ngenzeni Khulu? Kangifuni kuba sesithenjini mina.
Impendulo
LOLU kayisilo hlupho kodwa-ke umkakho uledlozi lokuthatha isithembo nje. Pho-ke ungazala uze ugcwalise indlu abantwana abangabafana uzathini ngoba kuyenzakala ukuthi ulokhalo kumbe isandla sabantwana abangabafana.
Mina ngikholwa ukuthi umntwana ngumntwana, angaba ngumfana kumbe yintombazana. Bonke yizipho ezivela kuSomandla.
Ngazo zonke izikhathi nxa kusenziwa abantwana kakho ongathi uyazi ukuba uzaphuma elabuphi ubulili. Wena nje khululeka uzihlalele wondle abantwabakho. Nxa isikhathi sokuthi welamise sesifikile uzelamisa. Nxa lokhu kungehlula dinga uyisekazi umchasisele ukuba umntwana usesemncinyane kungakho ngeke wenelise ukumelamisela masinya.
Kodwa-ke mzukulu kumele ngibuze ukuthi kungani wakhetha ukuyahlatshwa ijekiseni yokuthi ungabambi isisu lingazange livumelane lomkakho. Imuli ihlelwa lindawonye mzukulu kungakho kulokhu waphambanisa sibili.
Ngesikhathi esizayo kumele lihlale phansi livumelane.
Ngiphupha ngilomuntu wesilisa
Khulu ngilohlupho. Ngiphupha ngilomuntu wesilisa kodwa kangimbonisisi. Kungakho izikhathi ezinengi ngingathandana lejaha nxa selihlela ukuyavela sihle sehlukane kwezinye izikhathi ngimuzwa sengibikela ukuthi sethethe. Mina lami kwezinye izikhathi ngiyenyanya abesilisa, angazi ukuthi konke lokhu kubangelwa yini.
Impendulo
Mzukulu ngiyakholwa bakhona abanye labo abalohlupho olufana lolwakho labo bazancediseka ngempendulo engizakupha yona. Okukhona yikuthi lisetshenziswa yimoya yemikhoba. Umoya lo wenza ukuthi wenyanywe ngamajaha, njalo uyaxotsha amadoda kungaba ngesikhathi lingakathathani kumbe njalo kungenzakala selihlala lonke endlini.
Kwezinye izikhathi umoya lo ungalotsholwa uyakwenza uswele inzalo, uhlale uswela kumbe njalo ukuthi ufelwe ngabantwana. Umoya lo ulakho njalo lokukuxotshisa emsebenzini, uyaletha njalo imikhuhlane engapheliyo.
Ongakwenza-ke khathesi mzukulu yikuthi udinge umuntu olencwadi zeZinatha ukuthi axotshe umoya lo. Umoya lo ungaxotshwa ulakho ukubona izinto zakho sezihamba kuhle. Lokhu kakufuni sibhedlela mzukulu, zama ebantwini.
Online Reporter