Online Reporter
Nkosilathi Sibanda
KUZABUKISWA amasiko amaVenda, amaShangani lamaSotho kumkhosi weTshitaudze Heritage Festival eMpande, eBeitbridge, esabelweni seMatabeleland South.
Umkhosi lo, ozaqhutshwa okwakuqala uzabe useTshitaudze Cultural Village, kusukela mhlaka 25 kusiya ku 27 Mpandula.
Umbukiso lo, ukhangelelwe ukuhuga abathanda ezamasiko, abantwana besikolo, abakhokheli bezomdabu, abazobukisa okwehlukeneyo, kunye lezakhamizi ngenjongo yokulondoloza amasiko esiNtu lokwakha ubudlelwano phakathi kwabantu abehlukeneyo. UMkhokheli wenhlanganiso yezinduna zakuleli, induna uMtshane Khumalo kubikwa nguye ozabe engumhlonitshwa omkhulu kulumkhosi.
Amalungiselelo asesezingeni eliphezulu njalo abaqoqa lumkhosi baveze ukuthi sekulezakhiwo ezitshiyeneyo ezizasebenza njengendawo zokwamukela lokutshengisa amasiko emphakathi ezakuba yingxenye yomcimbi.
Kuzaqhutshwa imncintiswano yamaqembu enguqu, imidlalo yesiNtu, kanye lemigido yesiNtu. Osomabhizimusi labo bazathola ithuba lokubukisa lokuthengisa impahla lemisebenzi yabo.
Abalobi, imbongi, abahlabeleli labanye abagqugquzela ezamasiko bazabe bekhona, kuthi abathakazelela ukuthengisa labo bavunyelwe ukubukisa imisebenzi yabo.
Induna uTshitaudze, ikhuluma lephephandaba likazulu ithe umcimbi lo uzasetshenziswa ukutshengisa ubuhle bokwehlukana kwamasiko atholakala esigabeni seBeitbridge. “Sifuna ukuziqhenya ngesiko lethu njengamaVenda, kodwa siyazi ukuthi kulumhlubulo weMatabeleland
South kulabantu abakhuluma indimi ezitshiyeneyo. Yikho sinqume ukuhlangana lamaShangani lamaSotho ngoba labo bakhona kule indawo,” kutsho iNduna uTshitaudze.
Uthe umkhosi lo uzakuba lithuba elibalulekileyo kubaculi bendawo ukuthi baziveze kuzulu. Abafundi abavela ezikolo ezingaba ngu-30 labo bakhangelelwe ukuba yingxenye yomcimbi, ngenjongo yokubafundisa lokubakhuthaza ukuthi balondoloze amasiko.
Blessing Chizhande