admin
Kangisakholisi emacansini
Ngingudade oleminyaka engu-26, ngilonana olenyanga ezinhlanu njalo ngihlala lobaba wengane. Nansi inkinga, ngiyamthanda ngenhliziyo yami yonke kodwa Khulu nxa kumele senze ucansi angisela mizwa. Ngiyabe ngingafuni kwezinye izikhathi kodwa ngicina ngizibamba ngamandla ngizizwa ukuthi angikholisi.
Sokulamaviki amabili ngifaka i-pad ngimtshele ukuthi ngisesikhathini. Kuyini inkinga Khulu ngoba ubaba uzacina esiyaphandle ngibhekile. Siza, ngenzeni?
Impendulo
Ubaba yena ulemizwa yini? Useke wakhalaza ukuthi akakuzwa kuhle na? Iqiniso lithi nxa engelansolo ngalokho umyeni wakho esizwa kungelamehluko kutsho ukuthi usesebuthakathaka ngenxa yokubeletha. Umzimba wakho kawukabuthi uhlangane.
Nxa umngane wakho ekholisa iba sesimeni sokukholisa lawe ungaze wafuna ukukholisa wena ugula. Kudala mzukulu umntwana wakuqala wawumbelethela ngakini ngenhloso yokuthi unyoko akuphe izihlahla zokuqinisa umzimba. Kodwa ungaze wephuka umoya kuyaphela ubudlezane bungedlula.
Ngiyopha nxa ngihlangana lobaba
Ngithemba uphile kuhle emzimbeni Khulu. Ngicela ungincede ukuthi ngabe kwenziwa yini ukopha nxa ngihlangana lobaba njalo ngingakuqeda ngani. Khulu zikhathi zonke singahlangana ngiyangcolisa ingubo kodwa kangizwa buhlungu. Sengisesaba ukuthi mhlawumbe kungabe kuyikuthi ngile-cervical cancer.
Impendulo
Ngilusizi ngesimo sakho mzukulu wami. Into enhle yikuba uyebona amadokotela, yiwo azakuxakulula phezu kohlupho lwakho lolu. Okwesibili kuyadingeka ukuba ubikele lomkakho ngaloluhlupho ukuze laye akuncedise ngazo zonke indlela.
Kayisuye umfazi engimfunayo
Ngithemba iNkosi ikugcinile Khulu ngoba lami isangipha amandla. Khulu ngiyindoda eleminyaka engu-23. Uhlupho lwami yikuthi njengoba sengikhulile kumele ngizidingele umuntu ozakuba ngusomoya wami. Ngihlangane lentombi umoya wami wathatheka kodwa uhlupho engilalo yikuthi ukhona omunye ebesithandana kodwa uhlala kweleBotswana.
Intombi le eseBotswana iyaziwa ngakithi njalo bayayithanda kakhulu. Lo mina engimthandayo abangakithi kabafuni kuzwa ngitsho ngaye. Bathi sehlukane kodwa inhliziyo yami ibuhlungu. Khulu lo selesikhathi eside wahamba njalo kangikwazi ukuthi wenzani khonale mhlawumbe sethwele lomkhuhlane. Ngenzeni Khulu? Ngeluleka.
Impendulo
Mzukulu akula hlupho lapha, inhliziyo iyazikhethela kayikhethelwa. Okuqakathekileyo yikuthi wenze lokho okufunwa yinhliziyo yakho ngoba kusasa uzakhala ngezihlobo zakho. Lalelisisa okufunwa yinhliziyo yakho wenze khonokho.
Ngibona angathi okwenza izihlobo zakho zithande intombi le eseBotswana yikuthanda ukudla. Wena hlala phansi lonyoko umtshele okufunwa yinhliziyo yakho, ungaqali ukuthabisa abantu ngalokhu okuzakuhlupha empilweni yakho. Ukuthatha yisinqumo sempilo yakho yonke. Kungakho ngeke uhlale lomuntu ongamthandiyo ukhangelele ukuthi umuzi wenu uzaqina, ngeke kwenzakale lokho.
Ekucineni mzukulu wothi ngithi ungaphileli abanye abantu ngoba ungabe uqinisile sibili ukuthi intombi le ilakho ukuba lomkhuhlane yikho isifuna ukuzokuninda.
Online Reporter