admin
Ukholwa sekutheni umfazi lo?
KHULU ngilethemba lokuthi uziphilele. Mina ngiyindoda eleminyaka yokuzalwa engu-37 njalo ngangithethe sitshadile. Uhlupho olwaba khona yikuthi unkosikazi wami ubengangihloniphi kanye lezihlobo zami ngenxa yokuthi yena wayehola imali enengi kuleyami emsebenzini. Wayethi angaphuma endlini azihambele aze aphenduke mhlawumbe ngemva kweviki.
Kodwa wacina esesithi kasangifuni wasengidonsela emthethwandaba. Yena njengomuntu olemali uyahamba ayebhadala emthethwandaba aphiwe incwadi zokuthi lokhu sindawonye lanxa sesehlukana. Kungakho umthetho uyamvumela ukuthi afike endlini yabazali bami ezobona abantwabethu abane abatshiyayo.
Sekudlule iminyaka emibili isimo sinje. Okungikhathazayo Khulu yikuthi yena ulabesilisa athandana labo, mina lami sengimtholile engimthandayo kodwa ngiyesaba ngoba yena ulemali. Ngihlale ngingathathanga yini yena ekholisa emhlabeni. Ngapha lemthethwandaba sekudlule isikhathi eside indaba yethu ingakapheli. Ngenzeni Khulu?
Impendulo
NGILUSIZI kakhulu mzukulu wami ngesimo ophakathi kwaso, kodwa-ke mina kangiboni hlupho ngokungabi lemali kwakho. Ngoba lanxa ungelayo uyenelisa ukuya emthethwandaba uyebachasisela ngesimo okuso. Ingathi abadala nje bathi lompofu laye ngumuntu. Hamba emthethwandaba uyedinga omkhulu umlandisele udubo ophakathi kwalo.
Umtshele lokuthi umkakho usebenzisa imali yakhe ukukuncindezela. Ngiyazi mhlophe ukuthi umkakho ufuna ukukuzwisa ubuhlungu ngoba litshadile yena ezikholisela. Manengi amadoda atshadileyo enziwa abayanga ngomkabo kodwa kunguye obambe ngamandla ukuthi litshade. Mzukulu ngiyaphinda futhi hamba emthethwandaba uyebona omkhulu umlandisele indlela indaba yakho ethoniswa ngayo.
Utshela konke umama
NGITHEMBA uqine saka Khulu. Ngiyindoda eleminyaka engu-28 yokuzalwa, ngithethe njalo silomntwana oyedwa oyinkazana. Umkami yintandane njalo uyazwisisana kakhulu lomama ongizalayo. Singahlela into zethu endlini yethu uzwa lomama esekwazi. Ezinye zalezo zinto ziyabe zingafanelanga ukuthi zaziwe ngumama. Umama angathi lokho esikuhlelileyo akulunganga laye uhle athi umama uthe . . . Ayisibo bukhwele lobu Khulu kodwa kukhona okumele sikwenze emzini wethu sobabili singacelanga ukwelulekwa ukuze kukhanye ukuthi sesikhulile. Ngincedisa Khulu.
Impendulo
LOLU kayisilohlupho mzukulu wami. Ezikhathini ezinengi nxa unkosikazi wakho angazwana lonyoko kuba lokunye wena ongakwaziyo. Kungakho-ke wena ungakudingisisa kakhulu umama wakho uzabona sengathi wena uyamsola acine sekubuza ukuthi wena ubona angathi angafundisa umkakho izinto ezimbi na? Kungakho tshiyana lakho lokho wena ngoba kawukwazi okuyikho okwenza bazwisisana. Wena khangela nje uzithulele uqhubeke uhlela laye. Kanti khona mzukulu kulohlupho yini ukuthi umamazala azwisisane lomalukazana wakhe na? Akulahlupho lapha tshiya kunjalo.
Online Reporter