admin
Zulukandaba siyadibana kuliviki kunkundla yenu lapho esilidibanisa labahlabeleli, osaziwayo kanye lembongi ezilodumo lezisacathulayo. Kuliviki iphephandaba likazulu liliphakulela udaba olumnandi oludazulula uhambo oseluhanjwe nguMametsi Jubilee Moyo (MJM) kwezokuhaya. Akuzibalele ingxoxo ayenze lentathelizindaba yephephandaba likazulu uMthokozisi Dube (MD).
MD: Abalandeli bakho bangathanda ukwazi ukuba uMametsi ngubani njalo uzelwe ngawuphi umnyaka.
MMJ: Mina ngilijahaha elileminyaka yokuzalwa engu-23 okutsho ukuthi ngizelwe ngomnyaka ka1993 eGwanda emulini yabantwana abane njalo ngiyisicino.
MD: Kuyini okwenzayo kwezokuzithokozisa ngoba kunengi okwenzakalayo kwezokuzithokozisa?
MJM: Ngiyimbongi njalo ngenza ezokubukisa lapho engidweba khona imifanekiso ejabulisa uzulu.
MD: Abathokozisa uzulu bangena kule indima kulandela ukuqunjwaqunjwa ngabanye abayabe bevele besenza lumsebenzi. Wena ungatsho ukuthi ngubani owakuthintayo ukuze ungene kwezokuzithokozisa.
MJM: Imisebenzi kaMzwakhe Mbuli yiyo eyangithintayo ngabona lami ukuthi ngempela ngingenza okuthile.
Imisebenzi kaMbuli yangivula ingqondo ngabona ukuthi kulamathuba amahle angangenza ngiphile.
MD: Wasungena nini kwezokulibazisa uzulu?
MJM: Ngangena kwezokulingisa ngisasesikolo eSizane High School lapho engangilingisa khona emidlalweni.
Kulapho engacina ngisiba ngumlobi wemidlalo. Ngazothola njalo ithuba lokuyalingisa kumkhosi we-Intwasa lapho engahle ngagxila khona impande kwezokuthokozisa uzulu.
MD: Inengi labantu libona ezokulingisa kumbe ngithi ezokuthokozisa uzulu njengomsebenzi wabangafundanga ongeke uphilise umuntu. Uthini ngalokhu?
MJM: Kuyasidanisa ukuzwa inkulumo enjalo, kulabantu abaphila ngokuthokozisa uzulu. Mina ngilapha nje ngiqeqetsha izifundo zeHuman Resources Management eLupane State University kodwa inhliziyo yami igxile kwezokuzithokozisa.
MD: Ngaphandle kokuphatheka emkhosini omkhulu njenge-Intwasa, yiphi eminye imikhosi oke waphatheka kiyo ?
MJM: Ngike ngahaya kwaze kwavungama inkundla emikhosini yokuqeda izifundo kwabafundi eLupane State University okuyimikhosi eyande ukubizelwa abantu abalodumo kodwa ngokugudlana labo lami ngingathi ngithuthukile njalo ngafunda ukuthi nxa uphambi kwabantu kumele ubatshengise ukuthi okwenzayo awukuphumphuthi ngoba udume ngakho.
MD: Njengoba usacathula, kulenhlanganiso yokuzithokozisa ongathi ungaphansi kwayo nanko phela kuthiwa ukuze abalingisi badume kumele baxhaswe zinhlanganiso ezilodumo.
MJM: Angingeke ngitsho ukuthi kulenhlanganiso engingaphansi kwayo kodwa vele kulo umsebenzi okujwayelekileyo yikuthi siyasebenzelana sibe lobudlelwano kodwa lokho akutsho ukuthi singaphansi kwalowo esiyabe sisebenza laye. Njengabalingisi silokhu silwisa ukuthi lathi sibe leqembu lethu njengabafundi beLupane state university.
MD: Yibaphi abalingisi oke wagudlana labo emsebenzini wakho?
MJM: Sike salibazisa uzulu kuIntwasa loGabz Fire ongumlingisi owahluthuna isicoco sokuba ngumlingisi olodumo kuIntwasa nyakenye. Ngibuye ngalibazisa uzulu loDorcas Maseko ongumlobi wogwalo The Kind of Love we Deserve.
MD: Ngqobe bani othanda ukuzitshiyela abalandeli bakho?
MJM: Ngithanda ukuthi abalandeli bami ikakhulu abazali abalabantwana abathanda ezokuthokozisa abantu bangabavimbeli ukuze bafeze amaphupho abo. Amathalenta ethu angeke afana. Ezokulibazisa zenza ukuthi umuntu enelise ukutshintsha impilo yakhe, ikakhulu ngokumnika amacebo ekuqedeni inhlupho empilweni njalo kwenza uzulu azwisise ukutshiyana kwamasiko.
Online Reporter