Online Reporter
YiNtatheli kaMthunywa
KULENDODA yesigabeni seMberengwa eleminyaka engu-61 efe ngemva kokugongodwa ngesitina ekhanda kunye lebusweni ngumkayo ngemva kokuxabana.
UManford Mchede ubhubhele emzini wakhe eMnandi Village ngaphansi kwenduna uChizungu ngeSonto ebusuku, kulandela ukutshaywa ngumkakhe uThokozane Tshuma (62).
Isikhulumi samapholisa esabelweni seMidlands uInspector Emmanuel Mahoko uqinisekise ukuthi babophe uTshuma njalo uncedisa amapholisa kunhlolisiso abayenzayo.
“Amapholisa eMidlands aphenya udaba lokubulawa kwendoda eleminyaka engu-61 yesiqintini seMnandi Village ngaphansi kwenduna uChizungu, eMberengwa, mhlaka 20 Mpandula 2026 ngehola lika-10 ebusuku,” kutsho u-Insp Mahoko.
Uthe uMchede loTshuma babesemzini wabo ngesikhathi bexabana.
“Ukungazwanani lokhu kwabangela ukuthi baqale ukulwa, uTshuma wadobha isitina watshaya ngaso uMchede kanengi ekhanda lasebusweni,” kutsho u-Insp Mahoko.
Uthe amapholisa aya lapho okwenzakala khona isehlakalo lesi ngemva kokuthola umbiko njalo afica uMchede engasaphenduli.
Kwatholakala isitina esasigcwele igazi, okucatshangelwa ukuthi yiso esasetshenziswa ekuhlaselweni komuyi.
Uthe isidumbu sikaMchede sathathwa sasiwa eMberengwa District Hospital lapho esikhangelelwe ukuthi sihlolwe imbangela yokufa.
U-Insp Mahoko uxwayise uzulu ukuthi nxa kulokungazwanani ezimulini badinge umuntu wesithathu ukuze abancedise bakhumisane umlotha kulokulwa.
“Sixwayisa abantu ukuthi batshiye umkhuba wokusebenzisa udlakela nxa kulokungazwanani.
“Sikhuthaza abantu ukuthi badinge uncedo emapholiseni, kubakhokheli bezigaba kumbe kwezinye iziphathamandla ukuze kwenqatshelwe izingozi ezifana lalezi,” kuphetha uInsp Mahoko.
