adminKULENINA lakuleli ebelihlala eMpumalanga kweleSouth Africa elicobodise abantwabalo ababili amakhanda ngesando andubana lizibulale ngokuziphosela emgwaqweni kulemota ezayo kulandela ukuzwa ukuba umkalo ulomakhwapheni.
Inina leli elihlala kuExtension 2 eWesselton bucwadlana leErmelo khonale eMpumalanga kucatshangelwa ukuthi litshaye abantwabalo ababili olenyanga eziyisificaminwe mibili kanye loleminyaka emine ngesando ngoLwesibili kodwa izidumbu zaze zabonwa ngumkalo uIsaac Kangwari ngoLwesithathu ekuseni.
Kubikwa inina leli belizame laze ladela ukuthi umkalo aphenduke ekhaya kodwa kusehlula ngoba esehlanyisana lomakhwapheni.
UKangwari oleminyaka yokuzalwa engu-28 oyisizalwane sakuleli ubikele amapholisa ukuthi kalalanga endlini loba umkakhe wazama ukumncenga ukuthi aphenduke.
USergeant Gerald Sedibe ubikele iphephandaba leDaily Sun ukuthi: Umuyi, uTalent Muchara oleminyaka yokuzalwa engu-26 wayengekho endlini kodwa abantwana baficwa nguKangwari belaliswe embhedeni kukhanya sengathi batshaya isathongwana.
“Wasebona isando esilegazi phansi okwenza wagijima wayakhangela abantwana, wavula ingubo wasebona ukuthi bafile njalo babelamanxeba ekhanda.”
Uthe kukhanya sengathi abantwana bahlaselwa besebuthongweni njalo bembathiswa kuhle ingubo.
Ebona lokhu uKangwari wabikela amapholisa athi efika sokugcwele omakhelwane egumeni.
Kusenjalo isidumbu sikaTalent satholakala emgwaqweni uN11 kumango ongaba ngamamitha angu-60.
Omunye umakhelwane ongathandanga ukuqanjwa uthe uKangwari ubengaqalisi ukuba letshamali ngoba lokhu besekungumkhuba wakhe kuminyaka emine abuya loTalent kweleSouth Africa.
“Umama lo ubethwele nzima ngenxa yamatshamali omkakhe njalo lomkakhe ubengazihluphi ngitsho ukuthi akufihle lokhu,” kutsho umakhelwane lo.
“UTalent ubehlala esithi umkakhe wabuya laye kweleSouth Africa ukuzomyangisa kungakho ubethi engacela imali yokuthi aphindele kweleZimbabwe amncitshe.”
Izolo uKangwari kanye letshamali yakhe bebevalelwe enkambeni yamapholisa eErmelo ukuze bachwayisise ngamacala okubulala amabili kanye lelinye elokubulala kungelanhloso.—Ubulembu
Online Reporter