marble nkomo
KULOMHLABELELI weqembu laseNingizimu Africa owahlabela ingoma ethi, “nxa uyindoda uguga uzwile”. Ngempela ngakunanzelela lokhu ngemva kokubona umdala wami uKheswa, uNyambose omuhle esesele yedwa emzini wakhe, elezisebenzi lazo ezaphanga zabuyela kibo.
Wayebafundisile abantwabakhe abanye bengabameli, odokotela abanye njalo bengomongikazi, kwathi ukuhamba kwezibulo lakhe elalingudokotela emazweni aphetsheya kwezilwandle wafika wathengela abafowabo amatikiti endizamtshina balandela. Ekhaya lapha kwasala unina loyise.
Njengoba usazi ukuthi umuntu nxa esempunga uhlaselwa yimikhuhlane eminengi ngoba amasotsha omzimba avikela imikhuhlane ayabe esediniwe lawo mhlawumbe esefuna ukuthatha umhlalaphansi.
Bathi besizwa ukuthi unina nguye ongani kaphilanga ngokuphazima kweso bathumela icinathunjana labuya lamthatha unina lahamba laye eMelika.
Uyise wasala yedwa lomfana osebenza ukukhangela izifuyo. Ngensuku zakuqala sasimbulala isizungu esekhumbula intombi yakhe nanku phela yayithi nxa imphekela ukudla ipheke kuvuthwe busu ngoba amazinyo akhe ayengesenelisi ukuhlafuna izinto eziphonguyabuliswa.
Umfana wenkomo wayethi angahamba aye enkomeni uzasala yedwa uNyambose azilibazise ngokuvula umsakazo kwesinye isikhathi aze ajumeke.
Lomfana laye njengoba engumfana kwesinye isikhathi aze abuye sekunqunda amehlo laye edlule endaweni zakhe apheke esetatazela kulapho ababecina besidla izinto ezingavuthisisanga.
Ungakunanzelela banengi abazali abatshiywa bebodwa abantwana sebethethe unina, angazi kumbe isihelo sabo siba kakhulu kubonina mhlawumbe kuyibo ababevame ukutshona labo oyise besemsebenzini. Mina ngibona kungcono ukuthi nxa kuthe kwavela ithuba lokuthi baye emazweni kabathathwe bonke bengehlukaniswa ngoba lokhu yikuhlukumeza abazali baqale kutsha impilo yokuhlala omunye ele omunye ele.
Kubalimaza lemicabangweni kucina kubavusela lemikhuhlane yenhliziyo. Abantwana akumelanga babandlulule abadala nanku phela leBhayibhili incwadi engcwele lithi, “hlonipha uyihlo lonyoko ukuze insuku zakho zokuphila emhlabeni zande”.
Nxa abazali sebekhulile bafuna ukuphathwa ngesandla esibuthakathaka ngoba phela bayabe sebephenduke baba ngabantwana abadla iziwiji.
Ayixabene.
Online Reporter