INTOMBI YENJUBE IPHAPHELA PHEZULU

LIVERPOOL, ENGLAND - JULY 14: Felisitus Kwangwa of Zimbabwe in action during the Vitality Netball World Cup match between Northern Ireland and Zimbabwe at M&S Bank Arena on July 14, 2019 in Liverpool, England. (Photo by Emma Simpson/Getty Images)

Nkosilathi Sibanda
UKUSUKA kwakhe elokitshini le-Njube esiya eNgilandi, uFelistas Kwangwa wayehlose ukuthi ayetshengisa ithalenta lakhe kunkundla eziphezulu.

UKwangwa, ongumdlali wokuqaga, usefike kubanga lokubongwa ngethalenta lakhe nanko useduzane lokunikezwa isicoco se-Zimbabwe Achievers Award, okulibanga lenhlonipho ephiwa izizalwane zakuleli ezenza kahle phetsheya.

Umdlali weqembu lesizwe lo, uphumelele sakudlala esacathula kumaqembu akoBulawayo. Ngokukhethwa kwakhe kuqembu lama-Gems elenelisa ukuyancintisa kunkezo ye-World Cup ngo2019, umdlali lo wathengwa liqembu le-Surrey Storm elidlala kuligi ye-Vitality Netball Super League eUnited Kingdom ngesizini edluleyo.

Okwamanje, usephendukile koBulawayo.

Ekhuluma lentatheli ngoLwesibili, uKwangwa uthe uyakubona ukuthi umdlalo wakhe usuthinte abanengi kulandela ukudlala kwakhe enkundleni zaphetsheya.

Uthe kuyamjabulisa ukuzwa ukuba usekhethwe kumbango wesicoco sokuba yi-Female Sports Personality.

“Ukubatshazwa ngalindlela kuyangijabulisa. Bengingacabangeli ukuthi ngizathola inhlonipho enje,” kutsho uKwangwa.

“Lokhu akube ngumzekeliso kumantombazana wonke afisa ukufika ibanga engikulo. Kufuna ukuzimisela.”

I-Zimbabwe Achievers Award le ivumela abalandeli labathandi bezemidlalo ukuthi bavotele lo abambona ezenza kuhle ukwedlula bonke. Ukuvota kuqale mhlaka 19 kuNtulikazi kusiyavalwa mhlaka 15 Ncwabakazi.

Umkhosi wokunikeza izicoco ukhangelelwe mhlaka 11 Mpandula.