admin
Mthokozisi Dube
AKUBIZWA ozwayo enkundleni yeMandava lapho intshantshu zeligi iChicken Inn ezizagqikilana khona labafana beBorder Strikers kumdlalo wesibili kuligi.
Iqembu leBorder Strikers alisoze lidlalele eDulibadzimu kulandela ukuthi inkundla le ayikanikwa imvumo yiPSL yokuthi iphathe imidlalo yeligi.
Abafana bamaGamecocks bangena kumdlalo lo imsila iphezulu kulandela ukuvuthuza iDeMbare nge 3-0 kukanti abafana abatsha bangena kulo umdlalo bethoba amanxeba kulandela ukunqotshwa ngabafana bakagetsi, iZPC Kariba nge 2-0 eNyamhunga.
Umqeqetshi wabafana beBorder Strikers uSaul Chaminuka uthe bazakwenza izimanga kumdlalo wabo lo.
“Siyazi ukuthi amaGamecocks afuna ukukuveza obala ukuthi ngempela zitshantshu kuligi yakuleli kodwa lathi sifisa ukuba liqembu lakuqala ukunqoba intshatshu,” kubika uChaminuka.
UChaminuka ubike ukuba ungena kumdlalo lo labafana bakhe ngenjongo yokuthola imiklomelo emithathu.
“Abafana bami batsha kuligi yaphezulu kodwa lokho akutsho ukuthi sizakuba ngomathaphuzwa. Ngikhangelele ukaputeni uVhariso Michael loTendai Mukei yena ozabe edibana labaqhatshi bakhe ukuba ancedise abafana ukuze sithole imiklomelo emithathu,” kubika uChaminuka.
UChaminuka uphethe ngokuthi abadlali bakhe bonke baqine saka njalo uzakwethula ithimu ezaletha imiklomelo ngoba amaGamecocks esidla amahabula.
Online Reporter