admin
Buhlebenkosi Gaule
KULESALUKAZI selokitshini le-Iminyela koBulawayo esethuse izakhamizi ngokuphuma kombiko wokuthi uyigcwethi yokukhipha izisu kumantombazana azithweleyo kulindawo.
UTheresa Kundika oleminyaka yokuzalwa engu-45, owaziwa ngelithi ‘‘Mbuya’’ eMinyela, utshiye inkundla yomthethwandaba weWest Commonage ingelankani loba ephike wemba phansi ukuthi ulecala lokuncedisa eyinye intombazana ukukhipha isisu ebesilenyanga ezintathu.
Kuzwakale ukuthi uKundika wancedisa uGugulethu Ndlovu intombazana eleminyaka yokuzalwa engu-18 ukukhipha isisu ebesesilenyanga ezintathu.
UNdlovu utshele inkundla ngemva kokubuzwa ngumantshi uTemba Chimiso, ukuthi umuthi wokukhipha isisu wawuthola kuKundika.
“Icala lokuthi umthwalo ebengilawo ngiyalivuma njalo ngakhipha ngoba umuntu owanginika umthwalo wabaleka ngasala mina sengikhangelane lomthwalo ngingedwa.”
Emiswe phambili kukamantshi, uKundika uphike icala wathi yena akancedisanga muntu ukukhipha isisu yena unceda abantu.
“Mina Nkosi angilivumi icala lokuba ngancedisa uGugulethu ukukhipha isisu ngoba mina angisimuntu okhipha abantu izisu kodwa ngiyancedisa abantu ngemithi yesiNtu. UGugulethu wabuya kimi esithi ufuna umuthi wokukhipha isisu mina ngamnika umuthi wokuqinisa ukuthi singaphumi. Wabuya njalo okwesibili esithi ufuna umuthi olamandla ukwedlula lowo engangumuphe wona.
“Ngamnika okwesibili owokuqinisa isisu ukuthi singaphumi,” kutsho uKundika phambili kwenkundla.
Indaba yokhipha kwesisu sikaGugulethu yavela omakhelwane sebebona imigodi ehambisa amanzi angcolileyo isitutuma ngenxa yengcekeza eyayikhona khonapho. Omunye wabomakhelwane ongumfakazi, utshele inkundla ukuthi wabona izinto ezingani zinyama zomuntu zindenda phezulu wayabuya lamapholisa ukuba abone okwakusenzakala.
Kwatholakala isidumbu somntwana omncane ku-drainage ngakibo kaGugulethu ugoqelwe ngelembu likaGugulethu elalisaziwa ngugogo kaGugulethu okwenza ukuba bahle bazi ukuba umntwana ubengokaGugulethu wahle waqamba lomuntu owamnika umuthi wokukhipha isisu.
Online Reporter