adminYiNtatheli kaMthunywa
OKWEMINYAKA eyisithupha ilandelana, iqembu lenguqu eleSangano RevaPostoli selibe yintshantshu yeligi yeBulawayo Christian League, okuveza ukuthi iqembu leli alilamncintiswano kuligi le.
Intshantshu lezi, ezidume ngebizo elithi “amaPostoli” ziqale ukujabula ngempelaviki edluleyo ngemva kokunqoba iqembu labadlali beMpopoma Nazarene enkundleni yeNsukamini 3-1.
Umdlalo lo ucacise ukuba amaPostoli azimisele ukuthi ayefinyelela amaligi enhlanganiso zeZimbabwe Football Association kuminyaka ezayo. Iligi yeBulawayo Christian League yavunyelwa ukuthi idlale ingaphansi kweZifa ngomnyaka odluleyo.
Iphephandaba likazulu libukele umdlalo lo ophakamise leliqembu ebukhosini, kwavela ukuthi bakhona abadlali abakumaligi amancane abalethalenta eledlula lelo elibonakala enkundleni zamaligi afana lePremier League.
Ebuzwa ngokuphumelela kwabo okweminyaka eyisithupha, ukaputeni weSangano RevaPostoli uMark Manyathela uthe sebelangazelela ukuyaligiqa enkundleni zamaligi eZifa.
“Sithabe asizazi ngalokhu esikwenzileyo. Lo ngumnyaka wethu wesithupha sizintshatshu. Ukunqoba kwethu akutsho ukuthi siswela umncintiswano ngoba lamanye amathimu esidlala lawo ayatshisa ngenguqu. Kungasi kudlala kuhle kwamaqembu la, aluba lathi asidlali kuhle.”
Abadlali abakhulume loMthunywa babike ukuba ukudlala kwabo kuBulawayo Christian League sekutshintshe ingqondo yabo empilweni.
“Inguqu le isingitshintshe okwamagama. Khathesi sengingumdlali ozibuthilelyo njalo sengisazi ukuthi ngiyenelisa ukuphila kulumdlalo,” kutsho umdlali owesabe ukuqanjwa.
Kusenjalo umongameli weBCL uTimothy Mandizadza uveze ukukhathazeka ngenani labesifazana eliphatheka kwezemidlalo.
“Sisungule umdlalo wokuqaga kuligi yethu ngomnyaka ophelileyo ngenjongo yokuhuga abesifazane kwezemidlalo kodwa inani labo lokhe lisesephansi,” kubika uMandizadza.
UMandizadza ubike ukuba abesifazana kumele bathathe umzekeliso kulokho okwenziwa liqembu lamaPostoli lona eliphume lizintshatshu kuligi, baphatheke kwezemidlalo.
“IBulawayo Christian League izimisele ukukhipha abadlali abazakuyamela ilizwe kumidlalo efana leyama Youth Games ngoba sikholwa ukuthi lakithi kungaphuma abadlali abadlala okwamagama,” kubika uMandizadza.
Uqhubeke wathi: “Silethemba ngokusebenzelana labomama emabandleni inani labatsha ikakhulu abesifazane lizakhula ngoba ezemidlalo zihlanganisa abantu kungakhathelekile ukuba bavela kuwaphi amabandla,” kuveza uMandizadza.
UMandizadza uveze ukuthi abatsha laba kumele basebenzise iBulawayo Christian League ukuveza amaphupho lamathalenta abo.
Kusenjalo, iBulawayo Christian League isibike ukuba lonyaka izethula eminye imihlobo yemidlalo efana labo Judo abaqale ukuyibona ngama Youth Games ukuze amalunga athole ukukhetha imidlalo ayithandayo.
“NjengeBulawayo Christian League sifuna ukwethula imidlalo emitsha okuzenza ukuthi amalunga ethu akhethe imidlalo ayithandayo,” kuphetha uMandizadza.
Online Reporter