admin
Wayne Ncube
UHULUMENDE usekhuthaze uzulu ukuba aqaphele isiphepho (cyclone) sikaChalane esikhangelelwe ukuthi sifike elizweni leZimbabwe kusukela lamuhla (ngoLwesithathu) mhlaka 30 Mpalakazi (30 December).
Kukhangelelwe ukuthi lapho efika kuleli uChalane uzabe eseyi-Severe Tropical Storm engaseyi cyclone ngoba amandla akhe azabe esehlile kancane. Lanxa amandle akhe azabe esehlile kukhangelelwe ukuthi kune izulu elinengi kakhulu kusukela ngoLwesithathu ekuseni.
Kusitatimende uMphathintambo obona ngezokwethekelela uMangaliso Ndlovu uthe ukuza kwesiphepho lesi kumele abantu baqaphele ikakhulu kukhangele okwenziwa yisiphepho sika-Idai nyakenye endaweni zaboChimanimani laboChipinge lapho okwalahleka imiphefumulo eminengi.
“Ngikhulumela ukuthi sinanzelele njalo silimukisane ukuze singalahlekelwa yimphefumulo yabantu.
“Nxa ethinta iBeira, uChalane uyabe efinyelela umango ofika ibanga elingaphezu kwe-400km okutsho ukuthi kusukela ngo -6 ekuseni (ngoLwesithathu) indawo ezise-Eastern Highlands ezigoqela iChimanimani, Mutare, Chipinge lezinye eziseduze khonapho zizaqala ukuzuza izulu elinengi.
“Kusiyatshaya u-4 emini lamuhla ngoLwesithathu sikhangelele ukuthi uChalane afike eZimbabwe. Ngaleso sikhathi, silandela engike ngakutsho okwe-400km radius, izulu leli lizabe selisabalele eziqintini ezinengi zelizwe lapho esikhangelele ukuthi izulu libe lisina okungaphezulu kwalokhu esikwejayeleyo.
“Kusasa (ngoLwesine) mhlaka 31 Mpalakazi ilizwe lonke lizabe lembeswe nguChalane ngakho bakithi siyakhuthazwa sonke ukuthi sihlale ezindlini ukuze singahlangani lezingozi emgwaqweni lasezindleleni ezehlukeneyo,” kutsho uMphathintambo Ndlovu.
Uthe kukhangelelwe ukuthi ngoLwesihlanu mhlaka 1 Zibandlela 2021 uChalane uzasondela ayephuma esiya kweleBotswana okutsho ukuthi umango weBulilima, Mangwe, Matobo leGwanda uzabe ulokhu uphakathi kwezulu elinengi.
“Lizananzelela ukuthi lanxa ngithe kuzabe kungaseyiyo cyclone kuzabe sokuyi Severe Tropical Storm, kithi sikhangelele ukuthi umonakalo uzafana lowe-cyclone ngoba vele emavikini adluleyo sithole izulu elinengi okutsho ukuthi vele umhlabathi umanzi, imifula iyageleza eminye igcwele eminye ike yagcwala ngakho amathuba okuthi impophoma zamanzi zifike endaweni ezihlala abantu aphezulu kakhulu.
Kungakho-ke siqonqosela ukuthi asenzeni okusemandleni ukuthi sizivikele siphephe lezimuli zethu,” kutsho uMphathintambo Ndlovu.
Kusukela lamuhla abeMeteorological Services bazasebenzisana labemisakazo etshiyeneyo egoqela labama radio ukusabalalisa imilayezo mayelana loChalane ihola ngehola (every hour) kusukela ngama-10. Izinduna phose zonke kunye labosobhuku sebeqalile ukuthola ama-sms avela kuCPU ebahlomisa ngolwazi esikhangelele ukuthi luzadluliselwa ebantwini ezigabeni ezehlukeneyo.
“Nxa kulendawo esizaziyo ezisengozini yokugcwalelwa ngamanzi asibaziseni okhansila kumbe osobhuku kusiya kuDDC (uDA) ukuze benze imizamo yokususa abantu isikhathi sisekhona bebasa endaweni eziphephileyo. “
Uphethe ngokuthi: “Asiqakathekiseni ukuphepha, silondoloze impilo ezigabeni zethu, senze okusemandleni ethu ukuncedisana njengomphakathi. Nxa oyedwa esengozini, sonke sisengozini, yibo ubuntu bethu esiziqhenya ngabo.
“Siqaphele njalo abavame ukuthumela ama-message angelabufakazi njalo angaqondanga. Alakho ukudala umonakalo omkhulu ngakho ngiyakhuthaza ukuthi silalele imilayezo ezabe ivela kwabe-Met Services Department (MSD) kuma-radio lakuma WhatsApp sizabe sithumela imilayezo,” kuphetha uMphathintambo uNdlovu.
Online Reporter