admin
YiNtatheli kaMthunywa
OWATHI iTsholotsho FC izathengiswa wayengazi ukuthi usevuse ulaka kunengi labalandeli balithimu lezakhamizi ezizigqaja ngaleliqembu elitshibilika kuligi yeCastle Lager.
UMthunywa ukhulume lomnikazi wethimu le uMandla Manyathela othe uzwa ubuhlungu njalo udideke ingqondo kulandela imbiko esigcwele indawo yonke ethi yena usethengisa iqembu.
Ebuzwa ngalokhu, uManyathela ukhethe ukuthi apholise udaba kodwa kubemgceke ukuthi akalaso isifiso sokwehlukana lethimu le akhulela kuyo, wayenza yaba ligugu eTsholotsho.
Abalandeli beZiqholo zeZhwane lezakhamizi zeTsholotsho ezikhulume lephephandaba likazulu, zikhala ezimathonsi ngokuzwa ukuthi ithimu yabo izangena emkambo.
“Okwakhulunywayo konke ayisikho. Ayithengiswa ithimu. Izisebenzi eziphakathi kweqembu labadlali, bayazi ukuthi iTsholotsho FC imi ngaphi njengeqembu,” kutsho uManyathela ngoLwesithathu ekuseni.
“Okwakhathesi akulambiko omkhulu esingawethula. Okumele akhulume ngodaba lolu ngumgcinisihlalo wethu, kodwa akekho useGoli.”
UMthunywa ukuphethe ezandleni ukuthi bakhona osomabhizimusi ababalisa omalayitsha abahahabele iTsholotsho FC. Kubikwa iqembu leli kulemizamo yokuthi lithathwe ngosomabhizimusi hatshi ukuthi lisekelwe ngemali yomuntu oyedwa.
“Nxa kukhona okuhluphayo, sizamncedisa uManyathela. Iqembu akumelanga lithengiswe. Sizakuthini kubazukulu bethu nxa sebesizwa ukuthi abadala bavuma iqembu lesigaba lithengiswa?” kubuza uKillion Ncube ongumlandeli weZiqholo zeZhwane.
URegnald Mafohla oyisakhamuzi selokitshini leFusini eTsholotsho ubike ukuba inkinga ekhangelane leTsholotsho yikuthi yiyo yodwa ithimu engelankundla engeyayo phakathi kwamathimu wonke kuligi ephakemeyo.
“Ukuzwa ngokuthi iqembu lethu lizathengiswa kusizwise ubuhlungu kakhulu. Siyazi ukuthi udubo olukhona ngolwemali. Aluba inkundla yethu seyakhiwa ngabe asikhali ngalokhu.”
UMusawenkosi Sibanda olilunga labasekeli beTsholotsho FC uthe: “Ithimu kayibe ngeyomphakathi njengalokho okwenzakala kuHighlanders leDynamos.
“Singenza njalo kuzalunga. Izakhamizi zeTsholotsho zonke ezilothando lenguqu kumele zibhadale imali yokuthi ithimu ibe lemali esikhwameni.”
Ebuzwa ngokungahlaliseki kwabalandeli, uManyathela uthe akumelanga bakhathazeke.
“Abadlali labalandeli boqobo bayazi ukuthi kuyini okwenzakalayo. Angiboni ukuthi kukhona okungehlula ukuthi abafana bedlale lokuthi abasekeli bethu babelathi,” kubika uManyathela.
Iziqholo zeZhwane zidonsa nzima kuligi kulisizini ngoba zihlezi phezulu kweBorder Strikers ngemiklomelo eyisifica minwe mibili emidlalweni elitshumi lanye esidlaliwe.
Kumdlalo owedluleyo iqembu leTsholotsho lehlulwe yiChicken Inn nge 1-0 yona ebilabadlali abalitshumi nje kuphela.
Umsekeli kamqeqetshi uXolani Mafikela uphange wabika ukuba ukudliwa kwabo bazakulungisisa.
“Lingatsho elingakukhuluma kodwa phela ibhola ngumdlalo. Kuzamele sisebenze ukuze impumela yethu ibengcono,” kubika uMafikela.
Online Reporter