admin
NJENGOBA inani labantu abatholakala belomkhuhlane weCovid-19 liqansa, abezemidlalo bakhathazekile ngokuthi imidlalo ingamiswa nguHulumende njengendlela yokuzivikela.
Ezemidlalo zathinteka kakhulu ngomnyaka odluleyo kanye lengxenye yalonyaka, kukanti eminye yayisanda kuqala ukuvula kwasekuqhamuka omunye umhlobo wegcikwane.
Kumdlalo kanobhutshuzwayo kuligi yeCastle Lager kumiswe imidlalo emihlanu ngemva kokuqonga kwenani labadlali leziphathamandla zamaqembu ababanjwe belomkhuhlane.
Inhlanganiso yePSL ayizange yethule inombolo yalabo abatholakale belayo iCovid-19, kodwa kuyavela ukuba amanye amanye amaqembu kwaba labantu abafika itshumi lasikhombisa.
NgoLwesithathu, kwamiswa imidlalo egoqela iManica Diamonds leHighlanders, Dynamos leCranborne Bullets, WhaWha leBulawayo City, Black Rhinos leCaps United, ZPC Kariba leTriangle, Chicken Inn leTenax, Harare City leYadah.
Umdlalo owawuphakathi kweBulawayo Chiefs leChicken Inn wamiswa ekucineni.
Umdlalo owavunyelwayo ngoweNgezi Platinum leHerentals.
Iphephandaba likazulu lizwe ukuba inengi labadlali bebhola abakumaqembu akoBulawayo bavalelwe bodwa ngemva kokutholakala belomkhuhlane lo ngeviki edluleyo.
Lokho kutsho ukuba uma amaqembu engela abadlali bokwengeza, akusoze kube lemidlalo kuliviki.
Kukhilikithi, umdlalo womqhudelwano wePro50 phakathi kweMashonaland Eagles leMountaineers uphinde wamiswa kutholakale abadlali abane bele-Covid-19.
KoBulawayo ngeSonto kuqhutshwe umjaho we-10km Liquor Hub Fun Run.
Umxhasi womjaho lo uRaj Modi ukhuthaze kabanzi ngokuqakatheka kokuba abantu bahlolwe baphinde bazivikele kumkhuhlane weCovid-19.
Omunye wabodokotela bezempilakahle abagxile kuSports Science uLivingstone Sithole ubikele uMthunywa ukuba amaqembu kumele aqaphele, aqine ngokuphakamisa izinga lokuzivikela, ikakhulu nxa elolonga.
“Ukuzivikela ngokulandela izixwayiso kubalulekile. Isiphendukile i-Covid-19, kufanele siqaphele kakhulu. Kumele sizinakekele, ngitsho labezemidlalo kumele bakubone ukuthi inhlelo zonke ziyalandelwa,” kutsho udokotela lo.
Online Reporter