admin
YiNtatheli kaMthunywa
KUKHEFU lenguqu eselengeziwe, kuzabaluleka ukuthi iqembu leHighlanders liqinise abadlali balo basemuva ngoba kusegcekeni ukuthi imvimbi zalithimu ziyaxega.
Kumalungiselelo aleliqembu, umqeqetshi walo omutsha uMark Harrison ulomthwalo wokuthi asebenze labagadli bakhe ikakhulu labo abagijima esandleni sokudla. Kumdlalo odluleyo oweCastle Challenge Cup, umdlali owayephiwe ithuba kwesokudla, uCharlton Siyamalonga wenza amaphutha amanengi, okwadala ukuthi IFC Platinum ihlohle kabili.
Labagadli ababalisa uAndrew Mbeba loPeter Muduhwa kanye lonozinti uAriel Sibanda babona intuthu mhla welanga.
Umbono womqeqetshi omutsha lo ngowokuthi abadlali bakhe bafunde isiko lokudlala ibhola beliqalisela emuva, kodwa kukhanya kubanzima ukuthi balandela icebo leli.
Usekubeke kwacaca uHarrison ukuba umsebenzi wakhe kuBosso ayisiwo wokuvuselela kodwa ngowokulungisisa obekufile.
Inyathelo likaHarrison leli alizange licace kubabukeli bomdlalo wangoMgqibelo, okungesinye isizatho esadala inzondo kubasekeli beTshilamoya.
Umqeqetshi lo osephiwe ibizo elithi “Hadebe” kunguqu, utshele abezindaba ngemva komdlalo ukuthi isifiso sakhe ngesokuthi iBosso inqobe.
“Kunengi okumele sikwenze kodwa ngilesiqiniseko sokuthi nxa sesincintisa okuzwayo kumidlalo yePSL, kuzatshintsha. Lami ngiyabe sengilombono wokuthi yini efuna ukulungisiswa,” kutsho lumqeqetshi.
IBosso iqale ukulitshikihla ibhola ngemidlalo emibili ingqikilana leBlack Rhinos leChapungu. Kumidlalo le kwavela njalo ukuthi imvimbi zisafuna ukulungisiswa.
Online Reporter